Almatyda Abaı kúnine oraı «Alǵashqy kitap» derekti fılminiń premerasy ótti
ALMATY. KAZINFORM – Abaı kúni qarsańynda Almatyda ashyq aspan astynda «Alǵashqy kitap» derekti fılminiń premerasy ótip, merekelik kesh kontserttik baǵdarlamamen jalǵasty.
Qazaqstan Respýblıkasy Mádenıet jáne aqparat mınıstrliginiń tapsyrysymen, Ulttyq kınony qoldaý memlekettik ortalyǵynyń qoldaýymen túsirilgen «Alǵashqy kitap» derekti fılmin myńdaǵan kórermen tamashalady.
Dokýdrama janryndaǵy týyndy 1909 jyly Sankt-Peterbýrgte Ilıas Boraganskııdiń baspahanasynan jaryq kórgen Abaı Qunanbaıulynyń tuńǵysh kitabynyń tarıhyna arnalǵan.
Fılm avtorlary Abaıdyń alǵashqy kitabynyń qalaı jaryq kórgenin, jınaqty kim daıyndaǵanyn, onyń nelikten Semeıde emes, Sankt-Peterbýrgte basylǵanyn jáne kitapty shyǵarý barysynda qandaı kedergiler bolǵanyn zertteıdi.
– Fılm Abaı kózi tirisinde óz shyǵarmalaryn jınaqtap, kitap etip shyǵarýǵa áreket etti me, kitapty kim daıyndady, qalaı baspa betin kórdi, nege Semeıde emes, qııandaǵy Peterborda basyldy degen saýaldarǵa jaýap izdeıdi, – delingen uıymdastyrýshylar aqparatynda.
Fılm kórsetiliminen keıin Almaty qalasy ákimdiginiń Mádenıet basqarmasy uıymdastyrǵan Abaı murasyn nasıhattaýǵa arnalǵan kontserttik baǵdarlama ótti.
– Bul keshtiń basty maqsaty – Abaıdyń ádebı jáne mýzykalyq murasyn búgingi kórermenge zamanaýı formatta usynyp, uly oıshyldyń shyǵarmalaryn keńinen nasıhattaý, – dep atap ótti uıymdastyrýshylar.
Mýzykalyq-poetıkalyq qoıylymǵa Talǵat Kúzembaev, Lıdııa Kádenova, Erlan Bilál, Darhan Súleımenov, Asan Májıt, Dınara Kemelhan, Erden Jaqsybek, «Alashuly» toby jáne Hor kapellasy qatysty.
Merekelik baǵdarlama odan ári Abaı kúnine arnalǵan «Almaty Summer Fest» festıvaline ulasty. Sahnada Maqpal Júnisova, Janar Duǵalova, Ashat Tarǵyn, Nurlan Berdibaev, Serik Isahan, Ayarai, Birzhan Demeuuly, Nurtore, Magsoul, «Kesh You», «6ellucci», «IL Canto» jáne basqa da ónerpazdar óner kórsetti.
Festıval barysynda Abaıdyń ánderi shyrqalyp, óleńderi men qara sózderinen úzindiler oqyldy. Merekelik kesh sońynda myńdaǵan kórermen uly aqynnyń ánderin birge shyrqady.
