Almatyda Abaı dańǵylynyń bir bóligi ýaqytsha jabylady

ALMATY. KAZINFORM — Jylý jelilerin jóndeýge baılanysty Abaı dańǵyly bir túnge jabylady. 

Almaty ákimdiginiń málimetinshe, aldaǵy jylytý maýsymyna daıyndyq aıasynda Abaı dańǵylynyń keıbir ýchaskesinde jylý jelilerin aýystyrý jumystary júrgiziledi.

— Osyǵan baılanysty 13 maýsym saǵat 23:00–den –14 maýsym tańǵy saǵat 08:00–ge deıin Abaı dańǵylynyń boıyndaǵy № 26 úıden bastap Saın kóshesine deıin batys baǵyttaǵy avtokólik qozǵalysy shekteledi, — delingen habarlamada.

Jóndeý jumystary kezinde kólikterge avtobýs jolaǵymen júrýge ruqsat etiledi. Shyǵys baǵytyna qaraı qozǵalysqa shekteý qoıylmaıdy.

Qaıta jańǵyrtý jumystary kezinde turǵyndarǵa ystyq sý úzdiksiz beriledi. Osy jyly qala boıynsha 39 km jylý trassasyn jańǵyrtý kózdelgen. Bul tozý deńgeıin 54 paıyzǵa tómendetedi.

Osyǵan deıin Almatyda birneshe kóshe qyrkúıekke deıin jabylǵany týraly jazǵanbyz.