Almatyda Abaı dańǵylynyń bir bóligi taǵy jabylady

ALMATY. KAZINFORM – Jylý jelilerin jóndeýge baılanysty Abaı dańǵyly bir túnge jabylady. 

Almaty ákimdiginiń málimetinshe, aldaǵy jylytý maýsymyna daıyndyq aıasynda Abaı dańǵylynyń keıbir ýchaskesinde jylý jelilerin aýystyrý jumystary júrgiziledi.

– Osyǵan baılanysty 11 shilde túngi saǵat 23:00-den bastap 12 shilde tańǵy saǵat 08:00-ge deıin Abaı dańǵyly boıymen batys baǵytta, naqtyraq aıtqanda, Nazarbaev dańǵylynan Abylaı han dańǵylyna deıingi aralyqta kólik qozǵalysy jartylaı shekteledi. Shyǵys baǵyttaǵy qozǵalysta ózgeris joq, - delingen habarlamada.

Buǵan deıin Abaı dańǵylynyń boıyndaǵy № 26 úıden bastap Saın kóshesine deıin batys baǵyttaǵy avtokólik qozǵalysy shektelgen bolatyn. 

Osy jyly qala boıynsha 39 km jylý trassasyn jańǵyrtý kózdelgen. Bul tozý deńgeıin 54 paıyzǵa tómendetedi.

Sondaı-aq jol jóndeý jumystaryna baılanysty 6 avtobýs marshrýty ýaqytsha ózgeredi.