Almatyda Abaı atyndaǵy respýblıkalyq mektep-ınternatynyń qurylysy qashan aıaqtalady
ALMATY. KAZINFORM — Almaty ákimi Abaı atyndaǵy daryndy balalarǵa arnalǵan respýblıkalyq mamandandyrylǵan mektep-ınternattyń qurylys barysyn tekserdi.
Merdiger kompanııa ókilderiniń aıtýynsha, qurylys jumystary bekitilgen kestege saı júrip jatyr, mejeli merzimnen keshikpeıdi. Negizgi tirek bolatyn monolıtti qurylym jedeldetilgen qarqynmen quıylyp, 10 mamyrǵa deıin tolyq aıaqtaldy.
Joba aıasynda 900 orynǵa arnalǵan shyǵarmashylyq mektebi men ınternat, aýmaqty kórkeıtý men kógaldandyrý, amfıteatrdy qaıta jańǵyrtý, ınjenerlik jelilerdi tartý jáne avtomatty sýarý júıesin ornatý kózdelgen.
— Qurylys jumystarynyń sońǵy kezeńinde demeýshilerdiń qarjysy esebinen zamanaýı dene shynyqtyrý-saýyqtyrý kesheni boı kóteredi. Oǵan basseın, kúres jáne boks zaldary, sondaı-aq daıyndyq sabaqtaryna arnalǵan jattyǵý zaly kiredi. Atalǵan bilim ordasynyń salynýy bilim berý júıesin damytýǵa qosylǵan qomaqty úles bolmaq, — dep habarlady ákimdikten.
Osyǵan deıin Almaty ákimi Bazis-A kompanııasynan mektep qurylysyn tezdetýdi talap etken bolatyn.
