Almatyda abattandyrý kezinde zań buzǵan merdigerge aıyppul salyndy
ALMATY. KAZINFORM - Almatylyqtar qala kóshelerin abattandyrý kezindegi zań buzýshylyqtarǵa shaǵymdandy.
Áleýmettik jelilerde Qurmanǵazy kóshesindegi jóndeýden keıin aǵashtardyń tamyry zaqymdanǵany týraly vıdeo jarııalandy.
Almaty turǵyndary qala ákimdigine merdiger men jaýapty tulǵalarǵa shara qoldanýdy, sondaı-aq aýmaqty qalpyna keltirýdi surap júgindi.
Almaty qalasy Almaly aýdanynyń ákimdigi Qurmanǵazy kóshesinde aýmaqty abattandyrý jáne gastrokóshe uıymdastyrý jumystary júrgizilip jatqanyn habarlady.
– Bul ýchaskede eńis bolýy sebepti tireý qabyrǵasyn ornata otyryp, jasyl jelek aýmaǵynyń deńgeıin kóterý jumystary júrgizilip jatyr. Qurylys jumystary aıaqtalǵannan keıin jasyl aýmaq tolyq abattandyrylyp, jańa butalar otyrǵyzylady jáne aýmaq qalpyna keltiriledi, – dep habarlady ákimdik.
Ákimdik kadrlarda kórsetilgen nysannyń shamamen eki jyl buryn kesilgen aǵashtyń túbiri ekenin túsindirdi.
– Jumys barysynda kópjyldyq aǵashtar men ósimdikterge zaqym keltirilgen joq. Sonymen qatar qurylys jumystaryn júrgizý erejelerin buzǵany jáne irgeles aýmaqqa tıisti deńgeıde kútim jasamaǵany úshin merdiger uıym ákimshilik jaýapkershilikke tartyldy. Qazir kompanııaǵa qatysty ákimshilik hattama toltyrylyp, aıyppul salyndy, – delingen habarlamada.
Aýdan ákimdigi abattandyrý jumystarynyń barysy men merdigerlerdiń jasyl jelekterdi kútip-ustaý jáne qorǵaý talaptaryn saqtaýyn turaqty baqylaýda ustap otyrǵanyn atap ótti.
Eske salaıyq, Abaı oblysynyń turǵyndary abattandyrý erejelerin 9 myń ret buzǵany habarlandy.
