Almatyda 9 myńnan astam turǵyn ataýly áleýmettik kómek aldy

ALMATY. KAZINFORM – Almatyda 9 myńnan astam turǵyn ataýly áleýmettik kómek aldy. Bul jóninde Óńirlik kommýnıkatsııalar qyzmetinde ótken baspasóz máslıhatynda Almaty qalasy Jumyspen qamtý jáne áleýmettik baǵdarlamalar basqarmasynyń basshysy Baýyrjan Jaýbasov málimdedi.

Ol ataýly áleýmettik kómektiń (AÁK) ýaqytsha sıpatqa ıe ekenin, onyń basty maqsaty – azamattardyń eńbekke belsendiligin arttyrý ekenin de atap ótti.

«Ataýly áleýmettik kómek – bul ómir boıy tólenetin járdemaqy emes, ol ómirinde qıyndyq bolyp jatqan otbasyǵa aıaqtan qaıta turýǵa múmkindik beretin ýaqytsha qoldaý sharasy. Basty maqsatymyz – jaı kómek kórsetý emes, azamattardyń eńbek etýine jáne áleýetin júzege asyrýyna jaǵdaı jasaý», – dedi Baýyrjan Jaýbasov.

Onyń aıtýynsha, AÁK alý úshin otbasynyń eńbekke jaramdy músheleri jumyspen qamtý baǵdarlamalaryna qatysýǵa tıis.

Ataýly áleýmettik kómek eki túrge bólinedi. Birinshisi, shartsyz kómek – eńbekke aralasa almaıtyn azamattarǵa (І-ІІ toptaǵy múgedektigi bar jandarǵa, qarttarǵa kútim jasap otyrǵan adamdarǵa jáne t.b.) taǵaıyndalady.

Ekinshisi, shartty kómek – eńbekke jaramdy otbasy músheleri jumyspen qamtý sharalaryna (jumysqa ornalasý, oqytý, qoǵamdyq jumystar jáne t.b.) qatysqan jaǵdaıda beriledi.

2025 jyly 1 qazanǵa deıin Almatyda 1 819 otbasy, ıaǵnı 9 063 adam ataýly áleýmettik kómek alǵan.

«Mundaı qoldaý sharalary azamattarǵa ýaqytsha qıyndyqty eńserýge ǵana emes, kúshine degen senimin arttyryp, jigerin janyp, otbasynyń turmysyn óz eńbegimen qamtamasyz etýge jol ashady», – dep sózin túıindedi Baýyrjan Jaýbasov.

Aıta keteıik, Almatyda 4,3 myńnan astam nysan múgedektigi bar jandarǵa beıimdelgen.