Almatyda 885 otbasy jańa páterdiń kiltin alady
ALMATY. KAZINFORM — Almaty ákimi Darhan Satybaldy men «Otbasy bank» AQ basqarma tóraıymy Lázzat Ibragımova turǵyn úı jaǵdaıyn jaqsartýǵa muqtaj otbasylarǵa jańa páterlerdiń kiltin tabystaý rásimine qatysty. Baǵdarlamanyń alǵashqy kezeńi aıasynda kommýnaldyq turǵyn úı qorynan 885 otbasy baspanamen qamtamasyz etiledi.
Jańa qonys ıelerin quttyqtaǵan Darhan Satybaldy azamattardy qoljetimdi turǵyn úımen qamtamasyz etý memlekettik áleýmettik saıasattyń basym baǵyttarynyń biri ekenin atap ótti.
— Memleket basshysy Qasym-Jomart Kemeluly Toqaevtyń tapsyrmasyna sáıkes, halyqtyń ál-aýqatyn arttyrý — memlekettik saıasattyń negizgi basymdyqtarynyń biri. Ásirese, memlekettiń qoldaýyna shyn máninde muqtaj azamattardy turǵyn úımen qamtamasyz etýge erekshe kóńil bólinedi. Bıyl Almatyda turǵyn úıge muqtaj 11 myńnan astam azamattyń baspana jaǵdaıyn jaqsartý josparlanyp otyr, — dedi shahar basshysy.
Onyń aıtýynsha, búgingi kezeń almatylyqtardy turǵyn úımen qamtamasyz etý jónindegi aýqymdy jumystyń bastamasy boldy. Alǵashqy kezeńde 885 páter berilse, ekinshi kezeńde — 1832, úshinshi kezeńde — 670, al tórtinshi kezeńde 6161 páterdi tabystaý josparlanǵan. Osylaısha, jyl sońyna deıin myńdaǵan almatylyq otbasy baspana máselesin sheshýge múmkindik alady.
Jalpy, 2026 jyly 8250 azamat jaldamaly turǵyn úımen qamtamasyz etiledi. Sonymen qatar, 1298 adam jeńildetilgen nesıe baǵdarlamalary arqyly baspana satyp alsa, keminde 1650 jas maman «Almaty jastary» baǵdarlamasy aıasynda jeke baspanasynyń ıesi atanady.
Budan bólek, qalada memlekettik qoldaýdyń qosymsha tetikteri de jalǵasady. Áleýmettik osal sanattaǵy azamattarǵa ıpotekalyq nesıe rásimdeý kezinde bastapqy jarnanyń bir bóligin óteýge arnalǵan turǵyn úı sertıfıkattary beriledi. Bıyl osyndaı 200 sertıfıkat tabystaý josparlanǵan.
Sondaı-aq, jaldamaly turǵyn úıde turatyn azamattarǵa jaldaý aqysynyń bir bóligin sýbsıdııalaý tetigi de saqtalady. Bul shara turǵyn úıge muqtaj otbasylardyń qarjylyq júktemesin azaıtyp, baspananyń qoljetimdiligin arttyrýǵa múmkindik beredi.
