Almatyda 86 júk kóligi aıyp turaǵyna qoıyldy
ALMATY.KAZINFORM – Almatyda 2026 jyldyń on aıynda jol qozǵalysy erejelerin buzǵan 25 996 júk kóliginiń júrgizýshisi ákimshilik jaýapkershilikke tartyldy.
Qazir qalada 48 958 júk kóligi tirkelgen. «Taza Qazaqstan» bastamasy aıasynda polıtsııa kólikterdiń tehnıkalyq jaǵdaıyn, qujattaryn, tirkeý nómirleriniń talaptarǵa sáıkestigin jáne ekologııalyq normalardyń saqtalýyn tekserip jatyr.
Almaty qalalyq polıtsııa departamentiniń málimetinshe, 25 996 júk kóligi jol erejesin buzdy. Sonyń ishinde 86 júk kóligi aıyp turaǵyna qoıylyp, 222 júrgizýshiniń memlekettik tirkeý nómirlik belgileri alyndy.
– Júk kólikterin baqylaý – tek jol tártibin saqtaý máselesi emes, sonymen qatar megapolıstiń ekologııalyq qaýipsizdiginiń mańyzdy bóligi. Tehnıkalyq aqaýy bar kólikter, shyǵaryndylardyń belgilengen mólsherden asýy jáne paıdalaný talaptarynyń buzylýy qala ekologııasyna tikeleı áser etedi. Bizdiń mindetimiz – zań buzýshylyqtardy anyqtap, ákimshilik shara qoldanýmen ǵana shektelmeı, árbir jol qozǵalysyna qatysýshynyń qoǵam aldyndaǵy jaýapkershiligin arttyrý, – deıdi Almaty qalasy polıtsııa departamenti Ákimshilik polıtsııa basqarmasy bastyǵynyń orynbasary Darhan Qylyshpaev.
Polıtsııa departamentiniń baspasóz qyzmeti profılaktıkalyq jumystar jol qaýipsizdigin arttyrýǵa, qorshaǵan ortaǵa keletin zııannan qorǵaýǵa baǵyttalǵanyn aıtady.
Eske salsaq, buǵan deıin Almatyda 9 myńnan astam elektrosamokat aıyp turaǵyna qoıylǵan edi.
