Almatyda 840 lıtrden astam alkogol ónimi tárkilendi

ASTANA. KAZINFORM — Almaty qalasynda mas kúıinde jasalatyn quqyq buzýshylyqtar men qylmystardyń aldyn alýǵa baǵyttalǵan «Alko-stop» jedel-profılaktıkalyq is-sharasy ótkizilip jatyr, dep habarlaıdy Polisia.kz.

Reıdterdiń alǵashqy kúninde polıtsııa qyzmetkerleri qoǵamdyq oryndarda alkogol ishý, spırttik ishimdikterdi zańsyz satý jáne qoǵamdyq tártipti buzý derekteri boıynsha ondaǵan quqyq buzýshylyqty anyqtady.

Іs-shara barysynda kámeletke tolmaǵandar arasyndaǵy profılaktıkaǵa, sondaı-aq esepte turǵan turǵyndardy baqylaýǵa erekshe nazar aýdaryldy.

Sonymen qatar alkogol ónimderiniń zańsyz aınalymynyń jolyn kesý baǵytynda júıeli jumys júrgizilip jatyr. Polıtsııa málimetinshe, bir kúnniń ózinde qalanyń ártúrli aýdandarynda spırttik ishimdikterdiń iri partııalary tárkilenip, alynǵan ónimniń jalpy kólemi 840 lıtrden asqan. 

Almaty qalasy PD Qoǵamdyq qaýipsizdik basqarmasynyń bastyǵy Tımýr Noǵaıbaevtyń aıtýynsha, «Alko-stop» jedel-profılaktıkalyq is-sharasy eń aldymen quqyq buzýshylyqtardyń aldyn alýǵa baǵyttalǵan.

— Osyǵan baılanysty alkogol ónimderin satý úderisine jáne azamattardyń qoǵamdyq oryndardaǵy tártibine baqylaý kúsheıtilgen. Ásirese jastar arasyndaǵy profılaktıkaǵa jáne kámeletke tolmaǵandardy quqyqqa qarsy áreketterge tartýdyń aldyn alýǵa basymdyq berilip otyr, — delingen aqparatta.

Aıta keteıik, polıtsııa elimizde jol-kólik oqıǵalarynyń aldyn alý jáne joldaǵy tártipti kúsheıtý maqsatynda júrgizýshilerge qatań eskertý jasady.