Almatyda 81 jastaǵy zeınetkerdiń páterin ıelenbek bolǵan úsh azamat ustaldy

Almaty qalasynyń polıtsııa departamenti málimetinshe, Túrksib aýdanynda polıtsııa qyzmetkerleri er adamdy zańsyz bas bostandyǵynan aıyrý jáne oǵan qatysty alaıaqtyq jasaý áreketimen baılanysty aýyr qylmystyń jolyn kesti. Jalǵyz turatyn 81 jastaǵy zeınetkerdiń joǵalyp ketkeni týraly polıtsııaǵa onyń tanysy habarlaǵan.

- Jedel áreket etý nátıjesinde zeınetker qala mańyndaǵy eldi mekenderdiń birinde, jergilikti turǵyndardyń úıinen tabyldy. Ony urlady degen kúdikpen úsh azamat ustaldy. Kúdiktiler jábirlenýshiniń senimine kirip, onyń osal jaǵdaıyn paıdalana otyryp, bas bostandyǵyn shektegen jáne jyljymaıtyn múlkin óz atyna rásimdeýge kóndirmek bolǵan, - dep habarlady polıtsııadan.

Qazir adam urlaý faktisi boıynsha qylmystyq is qozǵalyp, eki er adam men bir áıel ýaqytsha ustaý ızolıatoryna qamaldy.

Eske salaıyq, Almaty polıtsııasy kúsheıtilgen jumys rejımine kóshti.