Almatyda 8 jastaǵy balanyń mıyna kúrdeli ota jasaldy
ALMATY.KAZINFORM — Almatydaǵy № 2 qalalyq balalar klınıkalyq aýrýhanasynda qazaqstandyq neırohırýrgter Germanııadan kelgen jetekshi mamanmen birlesip, segiz jastaǵy balanyń mıyndaǵy gamartomany alyp tastaý boıynsha kúrdeli operatsııa jasady.
Gamartoma — balalarda sırek kezdesetin týa bitken patologııa. Ol mı tinderiniń damýyndaǵy buzylystar saldarynan paıda bolatyn túzilis.
Balada týǵannan beri nevrologııalyq buzylys baıqalǵan. Atap aıtqanda, sebepsiz kúlý ustamalary, uıqy men sóıleý buzylystary, psıhıkalyq jáne sóıleý damýynyń tejelýi, bas aýrýy jáne esinen taný jaǵdaılary bolatyn. Buǵan mıyndaǵy sırek kezdesetin gamartoma sebep bolǵan. Gamartoma epılepsııalyq ustamalardy qozdyrǵan.
Naýqas birneshe jyl boıy mamandardyń baqylaýynda bolyp, dári-dármekpen emdelgen. Buǵan deıin oǵan birneshe ret hırýrgııalyq ota da jasalǵan. Alaıda emge qaramastan, ustamalar jalǵasa berdi.
Operatsııa halyqaralyq praktıkalyq sheberlik sabaǵy aıasynda ótti. Oǵan Germanııadaǵy «Sharıte» ýnıversıtettik klınıkasynyń balalar neırohırýrgııasy bóliminiń meńgerýshisi, professor Ýlrıh-Vılgelm Tomale qatysty.
Professor № 2 qalalyq balalar klınıkalyq aýrýhanasynyń neırohırýrgııalyq tobymen birlesip, neıronavıgatsııa jáne operatsııa kezindegi neıromonıtorıng tehnologııalaryn qoldana otyryp, túzilisti mıkrohırýrgııalyq ádispen alyp tastady.
Halyqaralyq tájirıbe almasý nátıjesinde balalarǵa kúrdeli joǵary tehnologııalyq operatsııalar jasalyp qana qoımaı, otandyq mamandardyń kásibı biliktiligin arttyrýǵa da múmkindik týdy.
— Mıynyń kúrdeli aýrýlary bar balalardyń Qazaqstanda joǵary tehnologııalyq medıtsınalyq kómek alý múmkindigi bolǵany biz úshin mańyzdy. Halyqaralyq yntymaqtastyq, tájirıbe almasý jáne zamanaýı hırýrgııalyq tehnologııalardy engizý otandyq neırohırýrgııany damytýǵa jáne kúrdeli jaǵdaıdaǵy patsıentterdi emdeý múmkindikterin keńeıtip jatyr, — dedi № 2 qalalyq balalar klınıkalyq aýrýhanasynyń dırektory Marat Rabandııarov.
№ 2 qalalyq balalar klınıkalyq aýrýhanasy balalar neırohırýrgııasy men epılepsııany hırýrgııalyq jolmen emdeý baǵyttaryn damytyp, dıagnostıka men emdeýdiń zamanaýı ádisterin engizýdi jalǵastyryp keledi.
Eske salsaq, Almatyda ókpe qaterli isigine robot-assıstent kómegimen alǵashqy ota jasalǵan edi.
