Almatyda 8 shildeden bastap bir kóshede kólik qozǵalysy shekteledi
ALMATY. KAZINFORM — Almatynyń Alataý aýdanynda 1988 jyly paıdalanýǵa berilgen jylý jelisi qaıta jańǵyrtylady.
«Almaty jylý jelileri» JShS málimetinshe, aldaǵy jylytý maýsymyna daıyndyq aıasynda uzyndyǵy shamamen 483 metr bolatyn jylý qubyry jańartylady.
Osyǵan baılanysty 8 shildeden bastap Nemırovıch-Danchenko kóshesiniń batys jaǵynda, Rysqulov dańǵylynan Raıymbek dańǵylyna deıingi aralyqta kólik qozǵalysy jartylaı shekteledi.
Júrgizýshiler bul aýmaqty Nemırovıch-Danchenko kóshesiniń shyǵys jaǵymen eki baǵytta da aınalyp óte alady.
Kompanııanyń málimetinshe, shekteý jer astyndaǵy jylý qubyryn josparly jańartý jumystaryna baılanysty engizilip otyr.
— Joba aıaqtalǵannan keıin jańa jylytý maýsymynda 14 kópqabatty turǵyn úı, 2 jeke turǵyn úı, 2 mektep jáne taǵy 10 nysan turaqty jylýmen qamtamasyz etiledi, — delingen habarlamada.
Jóndeý jumystary kezinde tutynýshylarǵa ystyq sý berý toqtatylmaıdy.
Eske salaıyq, buǵan deıin Almatyda Jumabaev kóshesiniń bóligi bir aıǵa jabylatynyn habarlaǵan edik.
