Almatyda bıyl jylý erte beriletin boldy
ASTANA. KAZINFORM — Qalada turǵyn úılerdi ortalyq jylý júıesine qosý 10 qazannan bastalady. Bul týraly Almaty qalasynyń Energetıka jáne sýmen jabdyqtaý basqarmasy habarlady.
Almatyda aýa temperatýrasynyń kúrt tómendeýine baılanysty qala ákimi Darhan Satybaldynyń tapsyrmasymen jylytý maýsymyn ádettegiden erterek bastaý týraly sheshim qabyldandy.
— 8 qazannan bastap qalada ortalyq jylytý júıesine qosylý jumystary bastalady. Jylý eń aldymen balabaqsha, mektep jáne medıtsınalyq mekeme syndy áleýmettik nysandarǵa beriledi, — delingen habarlamada.
Turǵyn úılerdi ortalyq jylý júıesine qosý 10 qazannan bastalady. Jylý berilgen soń PIK pen MIB mamandary úıdiń ishki jylytý júıesin retke keltiredi. Radıatorlar men tikqubyrdan aýa shyǵarylyp, qysym rettelip, páterlerdiń birkelki jylynýyn qamtamasyz etedi.
«AlJJ» kompanııasy aınalym rejımdi iske qosqan. Bul qajet bolǵan jaǵdaıda barlyq aýdanǵa jylýdy jedel berýge múmkindik beredi.
— Kásiporyn qysqy kezeńge tolyq daıyn. Yqtımal aqaýlarǵa jedel retke keltirý úshin materıaldar men jabdyqtardyń apattyq qory jasaqtalǵan. 2025-2026 jyldardaǵy jylytý maýsymynda 16 apattyq jáne jóndeý brıgadasy, barlyǵy 220 maman men 56 tehnıka birligi táýlik boıy kezekshilik etedi, — dep atap ótti vedomstvo.
Budan buryn Qazaqstannyń 11 óńirinde jylytý maýsymy bastalǵanyn jazdyq.