Almatyda 7 jyldan beri salynyp jatqan kólik tonneli paıdaǵa berilmek

ALMATY. KAZINFORM – Almaty ákimi Erbolat Dosaev Jansúgirov pen Seıfýllın qıylysyndaǵy jolaıyryqtyń qurylys qarqynymen tanysty.

Joba 2017 jyly qolǵa alyndy. Alaıda 259 jer telimin satyp alý qajettiligine baılanysty uzaqqa sozylyp ketti. Sońǵy jer ýchaskesi bıyl mamyr aıynda bosatyldy.

Joba boıynsha Seıfýllın dańǵylynda kólikterdiń úzdiksiz qozǵalysyn qamtamasyz etý úshin jalpy uzyndyǵy 690 metr bolatyn eki tonnel salý qarastyrylǵan. Al Jansúgirov kóshesi boıynsha kólik qozǵalysy jer deńgeıinde júzege asady. Sonymen qatar, 4 jerústi jaıaý júrginshiler ótkeli, trotýarlar jáne irgeles aýmaqty kógaldandyrý josparlanǵan. Qazir barlyq burylys jolǵa asfaltbeton jabyny tóselip, bir jerústi jaıaý júrginshiler ótkeli salyndy, sondaı-aq káriz jáne baılanys jelilerin qaıta qurý jumystary júrgizilip jatyr.

Sonymen qatar, Seıfýllın dańǵylyndaǵy «Batys» jáne «Shyǵys» tonneline asfaltbeton jabyn tóseý aıaqtaldy. Aldaǵy demalys kúnderi qozǵalys ashylady. Aýa raıy qolaıly bolsa ýaqytsha jol tańbalaryn syzý josparda.

Qala ákimi qurylys jumystaryn jedeldetip, nysandy abattandyrýmen birge kelesi jyldyń maýsym aıynyń sońyna deıin aıaqtaýdy tapsyrdy. Aıta ketý kerek, jolaıyryq iske qosylǵannan keıin Jansúgirov kóshesiniń ótkizý qabileti 15%-ǵa, Seıfýllın dańǵylynyń ótkizý qabileti 20%-ǵa artady dep kútilýde.

Osyǵan deıin Almatyda eki iri jolaıyryqtyń qurylysy aıaqtalatyny týraly jazǵan edik.