Almatyda 7 jáne 9 mamyr merekesi qalaı toılanady
ALMATY. KAZINFORM – Almaty ákimdigi Otan qorǵaýshylar kúni men Jeńis kúnine arnalǵan mádenı is-sharalardyń tizimin jarııalady.
6 mamyr
– D.Qonaev mýzeıinde «Aıbyndy ásker – táýelsizdik tiregi» atty tanymdyq sabaq jáne ekskýrsııa.
– Alatau Creative Hub ortalyǵynda «Otan qorǵaý – paryz, maqtanysh, abyroı» atty patrıottyq saǵat.
– Naýryzbaı aýdanynyń komıýnıtı ortalyǵynda (Júnisov kósh., 4/2a) «Batyrǵa hat» aktsııasy.
– Medeý aýdanynyń komıýnıtı ortalyǵynda (Halılýllın kósh., 140/5) aýdan jastarynyń Qazaqstan Respýblıkasy Ulttyq ulannyń ókilderimen «Erlik sabaǵy» atty kásibı baǵdar berý kezdesý-suhbaty.
– Baýyrjan Momyshuly atyndaǵy áskerı-sport kolledji tárbıelenýshileriniń qatysýymen (Pıatnıtskıı kósh., 100) «Urandy eldiń – urpaǵy qaısar» atty merekelik is-shara ótedi.
7 mamyr
– Saǵat 09:00-de Otan qorǵaýshylar kúnine oraı «Suńqar» halyqaralyq shańǵy tramplınderi kesheninde qala basshylyǵynyń, kúshtik qurylymdar men áskerı qyzmetshilerdiń qatysýymen Memlekettik Tý kóterý saltanatty rásimi ótedi.
– Saǵat 10:00-de 28 gvardııashy-panfılovshylar saıabaǵynda otandyq estrada juldyzdary men ónerpazdardyń qatysýymen merekelik kontserttik baǵdarlama bastalady. Kontsertte Roza Rymbaeva, Talǵat Kúzembaev, Maqsat Rahmet, Serikbol Saılaýbek, Qazybek Ádikeev, Dáýren Baıbórisııaqty óner maıtalmandary, sondaı-aq «Alataý serileri», «KeshYOU», «Muzart Life», «Alashuly» jáne «Arǵymaq» toptary, Almaty óńirlik garnızonynyń artısteri óner kórsetedi.
Sonymen qatar quqyq qorǵaý jáne qorǵanys organdarynyń aýmaqtarynda, sondaı-aq basqa da eskertkishter men stelalardyń janynda Dańq memorıalyna jáne qyzmettik boryshyn óteý kezinde qaza tapqan áskerı qyzmetshilerdiń qurmetine ornatylǵan monýmentterge gúl qoıý rásimderi ótedi.
Odan bólek «Almaty Gallery» galereıasynda (Dostyq dańǵyly, 44) Otan qorǵaýshylar kúnine oraı uıymdastyrylǵan sýretshi-músinshi, dızaıner jáne fotojýrnalıst Dáýren Maqsuthanulynyń «Izobrazıtelnyı mır» atty jeke shyǵarmashylyq kórmesi saltanatty túrde ashylady.
Alataý aýdanynyń komıýnıtı ortalyǵynda «Batyrlarǵa taǵzym» atty patrıottyq synyp saǵaty, Medeý aýdanynyń komıýnıtı ortalyǵynda balalarǵa arnalǵan merekelik ashyq hattar daıyndaý boıynsha «Qorǵaýshyǵa syılyq» sheberdiń dárisi, Naýryzbaı aýdanynyń komıýnıtı ortalyǵynda «Erlik – elge mura» atty patrıottyq kezdesý ótedi.
8 mamyr
D.Qonaev mýzeıinde «Uly Jeńis qaharmandary» atty fotokórme uıymdastyrylady. Al Yqylas atyndaǵy halyq mýzykalyq aspaptar mýzeıinde «Án – Jeńistiń serigi» atty mýzykalyq kesh ótedi. Memlekettik akademııalyq qýyrshaq teatrynda soǵys jyldarynyń aýyrtpalyǵyn baıandaıtyn belgili jazýshy Sh. Aıtmatovtyń shyǵarmasy boıynsha sahnalanǵan «ANA-JER ANA» spektakli kórsetiledi.
9 mamyr
– Saǵat 09:30-da 28 gvardııashy-panfılovshylar saıabaǵynda Dańq memorıalyna gúl qoıý rásimi ótedi.
– Saǵat 10:00-de 28 gvardııashy-panfılovshylar saıabaǵynda otandyq estrada juldyzdarynyń qatysýymen merekelik kontsert bastalady. Sondaı-aq 28 gvardııashy-panfılovshylar saıabaǵynda Uly Otan soǵysynyń ardagerleri men tyl eńbekkerleri úshin dala ashanasy uıymdastyrylyp, merekelik túski as beriledi.
9 mamyr kúni qalanyń ár aýdanynda merekelik baǵdarlamalar ótedi:
– Almaly aýdany – A.Imanov atyndaǵy skver;
– Alataý aýdany – Atletıkalyq aýyl;
– Áýezov aýdany – «Family Park» demalys saıabaǵy;
– Jetisý aýdany – Ál-Farabı atyndaǵy skver;
– Túrksib aýdany – S. Seıfýllın atyndaǵy saıabaq;
Eske salaıyq, Almatyda Jeńis kúnine oraı 15 ardagerge birjolǵy tólem berildi.
