Almatyda 68 qoǵamdyq kóliktiń baǵyty ýaqytsha ózgeredi

ALMATY. KAZINFORM — Almatyda marafon sharasyna baılanysty 20 sáýir kúni megapolıste birqatar qoǵamdyq kólikterdiń júris baǵyty ýaqytsha ózgeredi.

Osyǵan baılanysty tańǵy saǵat 06:00–den 11:30–ǵa deıin 68 avtobýstyń baǵyty ózgerip, trolleıbýstardyń qozǵalysy toqtatylady.

— Árbir marshrýttyń ýaqytsha syzbalarymen@AlmatyJoly Telegram-arnasyndaǵy 1593 myna siltemege kirip tolyq tanysýǵa bolady, — dep habarlady ákimdikten.

«Smelost byt pervym» korporatıvtik qory uıymdastyratyn Almaty Half Marathon-ǵa álemniń 40-tan astam elinen 10 myńǵa jýyq adam qatysady dep josparlanǵan. Marafon birneshe qashyqtyq boıynsha ótedi: 21,1 km (jartylaı marafon), 10 km, sondaı-aq skandınavııalyq júristen 10 km jáne Ekıden komandalyq estafetasy.

Jarys joly Tuńǵysh Prezıdent saıabaǵynan bastalyp, odan ári ál-Farabı dańǵylymen ótip, Ortalyq stadıonda aıaqtalady. 

Osyǵan deıin megapolıste Almaty Marathon-ǵa oraı birqatar kósheniń jabylatyny týraly jazǵan edik.