Almatyda 6,5 mln teńgeden astam aıyppuly bar júrgizýshi ustaldy
ALMATY. KAZINFORM – Almatyda 189 ret jol erejesin buzyp, 6,5 mln teńgeden astam aıyppul arqalaǵan azamat anyqtaldy.
Almaty qalalyq Polıtsııa departamentiniń málimetinshe, jalǵan memlekettik nómir taǵyp alǵan Zeekr avtokóligi Abaı dańǵyly men Ótegen batyr kóshesiniń qıylysynda ustaldy.
«Aıyppul boıynsha bereshek somasy 6 mıllıon 696 myń teńgeni qurady. Bul negizinen jyldamdyqty asyrý, qoǵamdyq kólik jolaǵyna shyǵyp ketý jáne belgileý erejelerin buzý boıynsha jınalǵan aıyppul. Kólik mamandandyrylǵan aıyppul turaǵyna qoıyldy», - dedi Almaty qalalyq PD Jergilikti polıtsııa qyzmeti basqarmasy bastyǵynyń orynbasary Tımýr Noǵaıbaev.
Tártip saqshylary azamattarǵa jol qozǵalysy erejesin buzǵany úshin ákimshilik aıyppuldardy der kezinde tólep, jol qozǵalysy erejelerin qatań saqtaýǵa shaqyrdy.
