Almatyda 600-ge jýyq avtobýstyń tútin shyǵarý deńgeıi normadan joǵary boldy
ALMATY. KAZINFORM — Almatyda jyl basynan beri 1,4 myńnan astam avtobýs ekologııalyq talaptarǵa sáıkestigi boıynsha tekserildi.
2026 jylǵy 3 qańtar men 30 maýsym aralyǵynda «Eco Almaty» JShS mamandary qaladaǵy avtobýs parkterine qaıta monıtorıng júrgizgen.
Esepte turǵan 2 525 avtobýstyń 1 407-si tekserilgen. Nátıjesinde 596 avtobýsta paıdalanylǵan gazdardyń ýyttylyǵy men tútin shyǵarý deńgeıi belgilengen normadan joǵary ekeni anyqtaldy.
Olardyń 150-i — dızel otynymen júretin avtobýstar bolsa, 446-sy — gaz qozǵaltqyshymen jabdyqtalǵan kólikter.
«Eco Almaty» ókilderiniń aıtýynsha, mundaı tekserýler atmosferalyq aýany qorǵaý talaptaryn oryndaý maqsatynda turaqty túrde júrgiziledi.
— Bul jumystardyń negizgi maqsaty — qoǵamdyq kólikterden bólinetin zııandy shyǵaryndylardy azaıtý, — delingen habarlamada.
Eske salaıyq, buǵan deıin Almatyda jyl basynan beri 13 myńnan astam kólik ekonormany buzǵanyn habarlaǵan edik.
