Almatyda 6 shaqyrymǵa jýyq jylý jelisi jańartyldy
ALMATY.KAZINFORM – Almatyda eki jyl buryn qolǵa alynǵan jylý jelilerin jańartý jumysy aıaqtaldy.
Almaty ákimdiginiń málimetinshe, Jetisý aýdanynyń Aınabulaq shaǵyn aýdanynda «Almaty jylý jelileri» JShS tapsyrysy boıynsha eki jyl buryn bastalǵan jylý jelilerin jańǵyrtý jumystary tolyq bitti.
Jalpy uzyndyǵy 5 865 metr bolatyn jylý jelileri jańartyldy.
Atap aıtar bolsaq, 2022 jyly – 1 730 metr, 2023 jyly – 2 000 metr, al 2024 jyly – 2 135 metr jeli qaıta quryldy.
«Bıyl «Aınabulaq» TM-18 jylý magıstrali boıynsha Maqataev kóshesinde (Jumabaev kóshesinen Pavlodarskaıa kóshesine deıingi aralyq) jańǵyrtý jumystary aıaqtaldy. Negizgi qurylys-montaj jumystary 2024-2025 jyldardyń kúzgi-qysqy kezeńi bastalǵanǵa deıin aıaqtaldy. Qazir atalǵan ýchaskeni kóriktendirý – jol tósemin usaq túıirshikti asfaltpen tóseý jumystary júrgizilip jatyr, keıin jol tańbalary syzylady», - dep atap ótti ákimdikten.
Jylý magıstrali 1981 jyly qoldanysqa berilgen, onyń paıdalaný merzimi – 43 jyl, al normatıvtik paıdalaný ýaqyty – 25 jyl.
Joba 344 kópqabatty úıdiń, 11 mekteptiń, 3 densaýlyq saqtaý jáne 483 basqa da nysannyń turǵyndaryn sapaly jylýmen qamtamasyz etedi.
Bıyl megapolıste 20 shaqyrym jylý jelisi qaıta jańǵyrtylyp, qalanyń 6 aýdanynda jylýaralyq kezeńde jumystar júrgizildi.
Buǵan deıin Almatyda 219 km jańa sýmen jabdyqtaý jelisi salynǵany týraly jazǵan edik.
