Almatyda 6 myń qyz papılloma vırýsyna qarsy vaktsına aldy

ALMATY. KAZINFORM - Almaty qalasynyń mektepterinde 2024 jyldyń 30 qyrkúıeginen bastap 11 jastaǵy qyzdarǵa adam papılloma vırýsyna qarsy josparly vaktsınatsııalaý, sondaı-aq 12, 13 jastaǵy qyzdarǵa vaktsınatsııa júrip jatyr.

Qalalyq sanıtarııalyq-epıdemıologııalyq baqylaý departamentiniń málimetinshe, megapolıste APV-ǵa qarsy birinshi dozamen barlyǵy 6 067 qyz vaktsınatsııalandy, onyń ishinde 11 jastaǵy qyzdar — 2 392, al 12-13 jastaǵy qyzdar — 3 675. Vaktsınatsııalanǵan qyzdar arasynda vaktsınatsııadan keıingi qolaısyz jaǵdaılar tirkelmegen.

— Vaktsınatsııalaýǵa ruqsaty bar medıtsına qyzmetkerleri egiletin adamdardy qarap, tekserýden ótkizip, vaktsınatsııalaýdy júrgizýge ata-anasynan (zańdy ókilderinen) kelisim alǵannan keıin júrgizedi. APV-ǵa qarsy vaktsınatsııa Dúnıejúzilik densaýlyq saqtaý uıymynda sertıfıkattalǵan, 6 aı aralyǵymen 2 dozadan turatyn, Qazaqstan Respýblıkasynda tirkelgen AQSh-tyń 4 valentti «Gardasıl» vaktsınasyn qoldanady. Bul vaktsına APV 6,11,16 jáne 18 túrlerinen qorǵaıdy, - dedi Sanıtarııalyq-epıdemıologııalyq baqylaý departamentiniń basshysy Qasymhan Alpysbaıuly.

Sondaı-aq ol vaktsına alýdyń mańyzdylyǵyna toqtaldy.

Almaty qalasynyń Bas sanıtarııalyq dárigeriniń aıtýynsha, elimizde jyl saıyn 1 900-ge jýyq áıelde jatyr moıny obyry anyqtalady jáne statıstıkaǵa sáıkes, kún saıyn 2 áıel jatyr moıny obyrynan qaıtys bolady.

Eske salaıyq, buǵan deıin Almatyda tumaý men JRVI juqtyrǵandar sany artqanyn jazǵanbyz.