Almatyda 5,6 mlrd teńgege jóndelip jatqan sýburqaqtar qashan iske qosylady
ALMATY. KAZINFORM – Almatyda 4 sýburqaqqa kúrdeli jóndeý jumystary júrgizilip jatyr.
Byltyr mamyr aıynda Almaty ákimdigi ǵımaratynyń shyǵys jáne batys jaǵyndaǵy, Respýblıka alańyndaǵy, sondaı-aq Ǵ.Músirepov teatry janyndaǵy sýburqaqtarǵa jóndeý júrgiziletinin belgili boldy. Bul jumystarǵa 5,6 mlrd teńgege jumsalatyny habarlandy.
Onyń ishinde Respýblıka alańyndaǵy sýburqaqty qaıta qurýǵa 2,48 mlrd teńge bólingen. Jobanyń merdigeri – «Ec Energy Qazakhstan» JShS.
Modernızatsııa aıasynda sýburqaqtardyń qurylymdary kúsheıtiledi. Injenerlik kommýnıkatsııasy, sý jabdyqtaýy, gıdrooqshaýlaýshy qabaty tolyq aýystyrylady. Nasos stantsııalary jáne sý súzý júıeleri jańartylyp, avtomattandyrylǵan basqarý engiziledi, sondaı-aq jaqyn aýmaqtar kórkeıtiledi.
Kazinform agenttigi Almatynyń qoǵamdyq keńistikterdi damytý basqarmasyna júginip, atalǵan nysandardyń qashan iske qosylatynyn naqtylady. Vedomstvo málimetinshe, 15 jylda alǵash ret jóndelip jatqan 4 sýburqaqtaǵy barlyq jumystar mamyr aıynyń sońynda aıaqtalýy tıis.
Sonymen qatar basqarma tehnıkalyq qyzmet kórsetý qaǵıdalaryna sáıkes, qaladaǵy barlyq sýburqaqtar 1 mamyrda iske qosylyp, 1 qazanǵa deıin kún saıyn saǵat 08:00-den 23:00-ge deıin jumys isteıtinin atap ótti. Temperatýrasy +5°C-tan tómen bolǵan jaǵdaıda ǵana sýburqaqtardy paıdalanýǵa tyıym salynady.
Odan bólek vedomstvo ózge sýburqaqtardy jóndeý máselesin de naqtylady.
– 2026 jyly ózge aýmaqtardaǵy sýburqaqtardy jóndeý josparlanbaǵan, - delingen jaýapta.
Eske salaıyq, megapolıste 150 sýburqaq bar, onyń 66-sy kommýnaldyq menshikte jáne olardy qalalyq qyzmetter kútip ustaıdy.
