Almatyda 52 adamnyń poıyzda ýlanýyna qatysty is qandaı satyda

ALMATY. KAZINFORM –  Ótken jyldyń jeltoqsan aıynda Almaty-2 temirjol vokzalyndaǵy poıyzda 52 adam ıis tıip ýlanǵan bolatyn.

Buǵan deıin atalǵan derek boıynsha kólik polıtsııasy qylmystyq is qozǵaǵany belgili boldy.

Kazinform saýalyna jaýap bergen Kóliktegi polıtsııa departamenti bastyǵynyń orynbasary Málik Qaıbar jekemenshik vagonda bolǵan oqıǵa boıynsha tergeý amaldary áli de júrip jatqanyn málimdedi. Sotqa deıingi tergeýdi Almaty-1 stantsııasyndaǵy jelilik polıtsııa basqarmasy QR Qylmystyq kodeksiniń 156-baby 2-bóligi («Eńbekti qorǵaý qaǵıdalaryn buzý») boıynsha júrgizip jatyr.

— Qazirgi ýaqytta sotqa deıingi tergep-tekserý jumystary jáne qajetti tergeý áreketteri júrgizilip jatyr. Onyń qorytyndysy boıynsha protsestik sheshim qabyldanatyn bolady. Ózge málimetter QR Qylmystyq-protsestik kodeksiniń 201-babynyń talaptaryna sáıkes jarııa etýge jatpaıdy, — dep jaýap berdi ol.

Eske salaıyq, Almaty-2 temirjol vokzalynda adamdar tabıǵı gazdan ýlanyp, 52 adam medıtsınalyq kómekke júgingen edi. Olardyń arasynda balalar da bar. On bala aýrýhanaǵa jatqyzylyp, ekeýi jansaqtaý bólimine túsken.