Almatyda 500 myńnan astam zańsyz alkogol bótelkesi joıylady
ALMATY. KAZINFORM – Almaty qalasynda zańdy kúshine engen sot qaýlysynyń negizinde tárkilengen 21 816 qaptama (515 512 bótelke) alkogol ónimi joıylady.
Almaty qalasynyń Ádilet departamentiniń málimetinshe, alkogol ónimderin joıýǵa Almaty oblysy Qonaev qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynyń 2026 jylǵy 30 shildedegi qaýlysy negiz boldy.
Atalǵan sot aktisine sáıkes, zańdy tulǵa, ıaǵnı kompanııa QR ÁQBtK 283-1-babynyń 5-bóliginde (taýarlarǵa arnalǵan ilespe júkqujattardy resimdemeý, sol sııaqty taýarlarǵa arnalǵan ilespe júkqujattarsyz etıl spırtiniń jáne (nemese) alkogol óniminiń aınalymy) kózdelgen ákimshilik quqyq buzýshylyqty jasaǵany úshin kináli dep tanylǵan.
- Sot zańdy tulǵaǵa 865 000 teńge mólsherinde aıyppul salý túrindegi ákimshilik jaza taǵaıyndap, alkogol ónimderin tárkileý jáne keıinnen joıý týraly sheshim qabyldady. 2026 jylǵy 17 qyrkúıekte Almaty qalasynyń memlekettik sot oryndaýshysy atalǵan sot qaýlysynyń oryndalýyn qamtamasyz etý maqsatynda atqarýshylyq is júrgizýdi qozǵady, - dep habarlady departamentten.
Ádilet departamentiniń ókilderi sot aktileriniń ýaqytyly oryndalýy memleket múddelerin qorǵaýdyń mańyzdy kepili ekenin atap ótti.
Eske salaıyq, buǵan deıin Qyzylordada quny 1,5 mln teńgeden astam kontrafaktilik ónim tárkilendi.
