Almatyda 500-den astam zańsyz saýda oryndary men oıyn-saýyq apparaty buzyldy

ALMATY. KAZINFORM — Almatyda zańsyz dúńgirshikterdi buzý jumystary júrip jatyr. 

Qala ákimdiginiń málimetinshe, Almatyda kóshedegi zańsyz saýdany joıý maqsatynda 306 zańsyz ornatylǵan statsıonarlyq emes saýda nysany men 222 oıyn-saýyq apparaty (kúsh ólsheýish) buzyldy. Sonymen qatar memlekettik jer qorynda zańsyz turǵyzylǵan 32 kúrdeli qurylymdy májbúrlep buzý úshin sotqa talap-aryz jiberildi.

— Qalǵan 139 saýda oryndaryn buzý jumystary bıyl 31 naýryzǵa deıin aıaqtalady. Qazirgi ýaqytta kommýnaldyq qyzmet bul nysandardyń zańsyz qosylǵan ınjenerlik jelilerin óshirý jumystaryn jalǵastyryp jatyr, — dep habarlady ákimdikten.

Almatyda 2025 jyldyń 4 aqpanynan bastap zańsyz saýda oryndaryn joıý jumystary bastalǵan bolatyn.

Eske salaıyq, buǵan deıin Almaty oblysynda 215 zańsyz qoqys úıindisi anyqtalǵanyn jazǵanbyz.