Almatyda 50-ge jýyq oqýshynyń ýlanýyna baılanysty qylmystyq is qozǵaldy
ALMATY. KAZINFORM — Almatyda Respýblıkalyq fızıka-matematıka mektebiniń 47 oqýshysy aýrýhanaǵa túsýine baılanysty isti polıtsııa tekseredi.
Qalalyq polıtsııa departamentiniń málimetinshe, atalǵan derek boıynsha Bostandyq aýdandyq polıtsııa basqarmasy janyndaǵy polıtsııa bóliminde qylmystyq is qozǵaldy.
— Qazirgi ýaqytta júrgizilip jatqan tergeý áreketteri, onyń ishinde sanıtarııalyq-epıdemıologııalyq baqylaý qyzmetiniń tekserý qorytyndysy negizinde oqıǵanyń barlyq mán-jaıy anyqtalyp, tıisti protsestik sheshim qabyldanady, — dep habarlady departamentten.
Eske salaıyq, buǵan deıin Almatyda Respýblıkalyq fızıka-matematıka mektebiniń 47 oqýshysy jedel ishek ınfektsııasynyń belgilerimen emhanaǵa jatqyzylǵany belgili boldy.
Keıin RFMM ákimshiligi oqýshylardyń aýrýhanaǵa túsýine baılanysty túsinik berdi. Búginde mektep ǵımaraty men mektep-ınternatta dezınfektsııalaý jumystary júrgizilgen. Al QR Bas memlekettik sanıtarııalyq dárigerdiń qaýlysyna sáıkes, mektep-ınternattyń jáne as blogynyń jumysy ýaqytsha toqtatylǵan. Sonymen qatar 14–16 qazan aralyǵynda mektep sabaqtary onlaın formatta ótedi.
