Almatyda 50-den astam eskertkish túngi jaryqpen jabdyqtaldy
ALMATY. KAZINFORM – Almatyda «Taza Qazaqstan» respýblıkalyq baǵdarlamasy aıasynda tarıhı ári mádenı eskertkishterge túngi ýaqytta jaryq berý jumysy júrgizildi. Jumys qalanyń barlyq aýdandaryn qamtydy. Shara aıasynda 56 monýment pen bıýst te jaryqtandyryldy. Qosymsha jaryqtandyrý úshin 128 projektor ornatyldy.
«Almaty Qala Jaryq» MKK bas ınjeneri Álimuhamed Jalpaqovtyń aıtýynsha, músinder men keshenderdi jaryqtandyrýǵa bıýdjetten qosymsha qarajat bólingen joq.
«Bir jerde azǵantaı jaryq boldy, biz onyń jumysyn jaqsarttyq. Eskertkishter múldem jaryqtandyrylmaǵan jerde biz monýment aldy qurylymnyń barlyq ulylyǵyn jaryqpen kórsetý úshin qolda bar resýrstardy qoldandyq. Qazir kóptegen qala turǵyndary men qonaqtary bul sulýlyqty sýretke túsirý jáne eske alý úshin qarańǵy ýaqytta eskertkishterge arnaıy keledi», - dedi ol.
Jaryqtandyrylǵan eskertkishter tiziminde Abaı, Ál-Farabı, Raıymbek batyr, Shoqan Ýálıhanov, Ahmet Baıtursynov, Dinmuhamed Qonaev eskertkishteri, Uly Otan soǵysynyń batyrlary men ınternatsıonalıst-jaýyngerlerge, asharshylyq pen saıası qýǵyn-súrgin qurbandaryna arnalǵan birqatar memorıaldar, Almaty qalasynyń qutqarýshylaryna arnalǵan eskertkishter, jáne ózge de monýmentter bar.
Eske salaıyq, buǵan deıin Almatyda beıbereket taksıster máselesi qalaı sheshiletinin jazǵanbyz.
