Almatyda «50 cent»-tiń kontsertine jalǵan bıletterdi satqan alaıaq ustaldy
Almatyda «50 cent»-tiń kontsertine jalǵan bıletterdi satqan 18 jastaǵy jigit ustaldy, dep habarlaıdy Kazinform.
Almatyda 18 jastaǵy L. esimdi azamat bılet satatyn kompanııanyń resmı ókiliniń atyn jamyla otyryp, Instagram arqyly bılet alýǵa ótinishterdi qabyldaǵan. Sondaı-aq áleýmettik jelide aýqymdy jarnamaǵa SMM menedjerin jaldaǵan.
Almaty qalalyq krımınaldyq polıtsııa basqarmasy kúdiktiniń ustalǵanyn málimdedi.
«Qazirgi tańda Almaly aýdandyq polıtsııa basqarmasynda aldanǵan azamattardyń aryzdary negizinde QR QK-niń 190-baby «Alaıaqtyq» boıynsha qylmystyq is tirkeldi. Jas jigit «50 cent»-tiń kontsertine jalǵan bıletterdi satqan. Alaıaqtyń basqa da bolýy múmkin qurbandaryn anyqtaýǵa baǵyttalǵan tergeý is-sharalary jalǵasýda», - dep habarlady Almaty qalalyq polıtsııa departamentiniń baspasóz qyzmeti.