Almatyda 50 avtobýsta gazdardy tazartýǵa arnalǵan qurylǵy bolmaǵan
ALMATY. KAZINFORM – Almatyda №3 kommýnaldyq avtobýs parki tekserildi.
Almaty ákimdiginiń málimetinshe, avtoparkte 289 avtobýs tirkelgen, onyń 40-y jóndeýde tur. Tekserý barysynda mamandar 249 kólikti teksergen. Sonyń nátıjesinde 50 avtobýsta paıdalanylǵan gazdardy tazartýǵa arnalǵan negizgi qurylǵy – katalızatordyń joq ekeni belgili boldy.
– Monıtorıng atmosferalyq aýany qorǵaý talaptaryn júzege asyrý maqsatynda ótkizilip otyr. Onyń basty mindeti – qaladaǵy negizgi lastaýshy kózderdiń biri sanalatyn avtokólik shyǵaryndylaryn azaıtý, - dep habarlady ákimdikten.
Odan bólek Almaty qalasynyń ekologııa departamenti birqatar avtokólik kásipornyna qatysty jospardan tys tekserý ótkizgen. «NEO City TRANS» JShS men «TALAP T» JShS avtobýs parkterinde júrgizilgen ólsheý nátıjeleri keıbir kólikterde zııandy shyǵaryndylardyń belgilengen normadan asyp ketkenin kórsetken.
Anyqtalǵan zańbuzýshylyqtarǵa baılanysty QR ÁQBtK-niń 333 jáne 334-baptary boıynsha ákimshilik hattamalar rásimdelip, jalpy somasy 13,3 mln teńge aıyppul salyndy. Sonymen qatar kásiporyndarǵa kemshilikterdi joıý jóninde tıisti nusqamalar berildi.
Eske salaıyq, Almatyda 28 sáýirden bastap tómen emıssııaly aımaqtyń (LEZ) pılottyq jobasy iske qosyldy.
