Almatyda 5 jylda «Sergek» kameralary 156 mlrd teńge aıyppul salǵan

ALMATY. KAZINFORM — Almatyda qalalyq máslıhattyń kezekten tys XL sessııasy ótti.

Sessııa barysynda memlekettik-jekeshelik áriptestik jobasy aıasynda «Sergek» kompanııasymen kelisimdi 1 jylǵa uzartý máselesi qaraldy. Almaty qalasy tsıfrlandyrý basqarma basshysynyń mindetin atqarýshy Meıram Dúısekovtiń aıtýynsha, qazir qalada 1641 «Sergek» kamerasy bar. Ol memlekettik-jekeshelik áriptestik 2026 jyldyń 31 jeltoqsanyna deıin uzartylǵan jaǵdaıda, kompanııa qosymsha 350 kamera ornatatynyn atap ótti.

Vedomstvo basshysy depýtattar suraǵyna jaýap bere otyryp, «Sergek» júıesiniń tıimdiligine de toqtaldy.

— Almatyda jyl saıyn joldaǵy ólim sany 30 paıyzǵa, jol-kólik oqıǵalarynyń sany 10 paıyzǵa azaıyp keledi. 5 jylda «Sergek» kameralary arqyly 156 mlrd aıyppul salynǵan jáne onyń 94 mlrd teńgesi óndirildi. Bul qarajattyń barlyǵy Almaty bıýdjetine tústi, — dedi Meıram Dúısekov.

Almaty ákiminiń orynbasary Almashan Smatlaev «Sergekpen» uzaq merzimdi kelisim jasaý kerek ekenin aıtty.

— Kelisimdi 1 jylǵa uzartý mańyzdy. Biraq bolashaqta uzaq merzimdi seriktestikti qarastyrý kerek. Mysaly, Abaı dańǵylyndaǵy avtobýs jolaǵynda tek 13 kamera jumys isteıdi. Biz «Sergekti» shaqyryp, olardyń sanyn kóbeıtý qajet ekenin aıttyq. Olar 500-den astam kamera ornatýǵa daıyn ekenin rastady. Sondyqtan jobany qoldaýdy suraımyn, — dedi Almashan Smatlaev.

Qalalyq máslıhat depýtattary jobany qoldap, daýys berdi.

Eske salaıyq, 2025 jyldyń aqpan aıynda basynda Astanadaǵy beınebaqylaý júıesinen «Sergek» ketip jatqany, onyń ornyna jańa júıeni BAÁ kompanııasy engizetini málim boldy.