Almatyda 5 myńnan astam adam qoǵamdyq oryndarda kalıan shekken
ALMATY. KAZINFORM – Almatyda veıpter men hosh ıistendirgishterdiń zańsyz aınalymyna baılanysty 30 qylmystyq is qozǵaldy. Bul týraly óńirlik kommýnıkatsııalar qyzmetinde ótken baspasóz máslıhatynda qalalyq polıtsııa departamentiniń resmı ókili Saltanat Ázirbek málimdedi.
Spıkerdiń sózinshe, polıtsııa qyzmetkerleri 25 myńnan astam veıpti tárkiledi.
–– Veıpterdi zańsyz ákelip jáne óndirgender úshin 2 myń AEK-ke deıin aıyppul, túzeý jumystary nemese 2 jylǵa deıin bas bostandyǵyn shekteý jazasy qarastyrylǵan. Eger qylmystyq top áreket etse nemese asa iri tabys tapqan jaǵdaıda, jaza 5 jylǵa deıin bas bostandyǵynan aıyrý jáne 5 myń AEK (18,46 mln teńge) mólsherinde aıyppul salý túrinde qoldanylady, - dedi Saltanat Ázirbek.
Sonymen qatar ol 2024 jyly Almatyda qoǵamdyq oryndarda kalıan shekkeni úshin 5 514 adam ákimshilik jaýapkershilikke tartylǵanyn atap ótti.
–– Zańnyń oryndalýyna baqylaý kúsheıtiletin bolady. Azamattardy belgilengen erejelerdi saqtaýǵa shaqyramyz, sebebi bul – óz densaýlyǵyńyz ben aınalańyzdaǵy adamdardyń qaýipsizdigi úshin mańyzdy, - dedi polıtsııa ókili.
Osyǵan deıin Almatydaǵy saýda úıleriniń birinen 5 myń veıp tárkilengen bolatyn.
Sondaı-aq onkolog-dáriger veıp pen elektrondy temeki qaterli istik týdyrýy múmkin ekenin aıtqan edi.