Almatyda sotty bolǵan 49 bala merekeni kolonııada atap ótti

ASTANA. KAZINFORM – Almatyda 49 kámeletke tolmaǵan bala merekeni kolonııada atap ótti. Bul týraly Polisia.kz saıty jazdy. 

Kámelet jasyna tolmaı sottalǵandar otyratyn respýblıka boıynsha jalǵyz kolonııa Almaty qalasynda ornalasqan. Bul Almaty qalasy, Almaty oblysy jáne Jetisý oblysy boıynsha QAJ departamentiniń №11 mekemesi, qazirgi ýaqytta onda 49 kámeletke tolmaǵan ul bala óz jazasyn ótep jatyr. 

Odan basqa 4 kámeletke tolmaǵan qyz bala Almaty oblysy Jaýǵashty kentindegi №10 mekeme aýmaǵyndaǵy tárbıe kolonııasynda jazasyn óteıdi.

– Jazasyn ótep jatqan kámeletke tolmaǵandardyń ishinen 34 jasóspirim asa aýyr qylmys jasaǵan. Eń jas jaza óteýshi 15 jasta. Osyǵan qaramastan, olar bala bolyp qalady sondaı-aq 1 maýsymda ózge balalary sııaqty kútedi, – dep atap ótti QAJD bastyǵy Qaırat Dálbekov.

Dástúr boıynsha jyl saıyn kolonııada balalar merekesin týǵan-týystarymen saltanatty is-shara uıymdastyryp atap ótedi. 1 maýsymda jasóspirimderdiń týǵan-týystary men jaqyndary úshin ashyq esik kúni ótkiziledi. Sonymen qatar estrada juldyzdarynyń qatysýymen kontserttik baǵdarlama qoıylady. Bul kúni sottalǵandardyń as máziri táttilerge toly bolady.

Kolonııa qyzmetkerleriniń aıtýynsha, balalardyń barlyǵy ata-analyq súıispenshilik pen kóńil bólinýge muqtaj, olardyń kópshiligi tolyq emes jáne qolaısyz otbasylarda ósken. Kolonııada jasóspirimder úshin barlyq ómir súrý jaǵdaılary jasalyp, sondaı-aq mereke jáne demalys kúnderin qyzyqty uıymdastyrýyna kóp kóńil bólinedi.

Jasóspirimdermen mekeme ishinde arnaıy psıholog, teologtar mamandar jumys isteıdi. QAJ qyzmetkerleri barynsha balalardyń  bos ýaqytyn mándi qylyp ótkizýge tyrysady. Úkimettik emes jáne qoǵamdyq uıymdar jazasyn ótep jatqandarǵa gýmanıtarlyq kómek kórsetedi.

 – Olar qandaı jaǵdaı bolsa da bala bolyp qalady. Biz olardyń árqaısysy óz qateligin túsinip, temir torǵa qaıta oralmaýy úshin bar kúshimizdi salamyz, – dep qosty QAJD bastyǵy.