Almatyda 46 jyl buryn paıdalanýǵa berilgen mektep jóndeýge jabylady

ALMATY. KAZINFORM — Almatyda respýblıkalyq mektepterdi jańartý jobasy aıasynda № 30 mektep-gımnazııasy jóndeýge jabylady.

Almaty qalasynyń bilim basqarmasy málim etkendeı, Medeý aýdanynda 46 jyl buryn salynǵan № 30 mektep-gımnazııasy ashylǵannan beri kúrdeli jóndeýden ótpegen. Qazir rekonstrýktsııalaý jumystaryn bastaý úshin barlyq daıyndyq sharasy aıaqtaldy, merdiger kompanııa tańdaldy.

Qurylys-montajdaý jumystary osy jyldyń naýryz aıynda bastalady. 2026-2027 oqý jylyna deıin oqýshylarǵa jaǵdaı jasalady. Qazir mektepte 1067 oqýshy oqıdy. Oqý qalypty rejımde, sabaqtar ýaqytyly ótip jatyr.

Medeý aýdanynyń bilim bólimi men Almatynyń bilim basqarmasy ata-analarmen kezdesip, mektepti jańartý jobasy týraly tolyq aqparat berdi.

№ 30 mektep-gımnazııasynyń oqýshylary Medeý aýdanyndaǵy basqa bilim berý mekemelerinde oqıtyn bolady.

— № 77 mektepte — 414, № 47— 326, № 56 mektepte — 210, M. Mámetova atyndaǵy № 28 mektep-lıtseıinde 117 oqýshy oqıtyn bolady. Buǵan qosa, oqýshylardyń qaýipsizdigin qamtamasyz etý úshin barlyq qajetti shara qabyldandy: qajet bolǵan jaǵdaıda olardy mektepterge avtobýstarmen tasymaldaý uıymdastyrylady, — dep habarlady basqarmadan.

№ 30 mektep-gımnazııasynyń jańartý jumystary aıaqtalǵannan keıin oqýshylar zamanaýı ári jaıly oqý jaǵdaıynda bilim alady.

Osyǵan deıin Almaty mektepteri bir aýysymda oqýǵa birtindep kóshetini týraly jazǵan edik. ıAǵnı, 2025 jyly 43 mektep atalǵan oqý formatyna aýysady.