Almatyda 46 jastaǵy áıel egilgen dáriden keıin komaǵa tústi

ALMATY. KAZINFORM — Almatyda «Jas qanat» shaǵynaýdanyndaǵy №28 emhananyń kúndizgi bóliminde ınektsııa saldyrǵan 46 jastaǵy áıel komaǵa tústi. Kazinform agenttiginiń tilshisi jaǵdaıdy anyqtap kórdi.

Komaǵa túsken Tolqyn Ájibekovanyń kúıeýi Ársen Dúısenbekovtyń aıtýynsha, bul jaǵdaı №28 emhananyń medıtsına qyzmetkerleriniń salǵyrttyǵynan bolyp otyr.

– Áıelim jótelip júrdi, keıin dárigerge qaralý úshin №28 emhanaǵa bardy. Biz «Jas qanat» shaǵynaýdanynda páter jaldap turamyz. Sondyqtan joldasym aldymen atalǵan medıtsına mekemesine tirkeldi. Rentgenge tústi. Onda eki jaqty ókpeniń qabynýy anyqtaldy. Keıin dárigerler emhananyń kúndizgi statsıonarynda ınektsııa saldyryńyz dedi. Ne salǵanyn bilmeımiz. Medbıkeler dárige allergııasy bar-joǵyn teksermesten, eshqandaı synamasyz tamshylatqyshty qoıǵan, - deıdi Almaty turǵyny.

Aıtýynsha, dárigerler der kezinde qajetti medıtsınalyq kómek kórsete almaǵan.

– Osylaısha, áıelim 3 maýsym kúni komaǵa tústi. Áli esin jıǵan joq. Jaǵdaıy aýyr. Qazir №4 aýrýhanada jatyr. Ózim baryp kórdim. Jasandy tynys alý apparatyna qosylǵan. Keshe, 8 maýsym týǵan kúni edi. 1979 jyly týǵan. Eki balamyz bar. Úlkeni 4 jasta, kishisi 2 jasta, - deıdi komada jatqan Tolqyn Ájibekovanyń kúıeýi.

Almaty qalalyq №28 emhanasy Kazinform redaktsııasyna jaǵdaıdy bylaı dep túsindirdi:

– Aıta ketý kerek, patsıentte jedel allergııalyq reaktsııa, ıaǵnı anafılaktıkalyq shok negizgi preparat engizilgennen emes, synama retinde júrgizilgennen keıin paıda boldy. Bul synama klınıkalyq hattamalarǵa sáıkes oryndaldy. Medıtsına qyzmetkerleri jedel járdem brıgadasy kelgenge deıin belgilengen standarttarǵa sáıkes shuǵyl kómek kórsetti, - dep habarlady emhanadan.

Emhanadan málim etkendeı, naýqas medıtsınalyq protsedýralar júrgizýge kelisimin berip, aqparattandyrý paraǵyna qol qoıǵan.

– Onda ol dárilik zattarǵa allergııa baryn kórsetpegen. Bul medıtsınalyq qyzmetkerler tarapynan táýekelderdi aldyn ala baǵalaýǵa kedergi keltirdi. Emhana naýqastyń jaqyn týystarymen baılanysta jáne onyń jaǵdaıy týraly aqparat oqıǵa bolǵan kúni berildi. Sondaı-aq mekeme dıalogqa ashyq jáne qoldanystaǵy zańnama aıasynda barlyq qajetti aqparatty týystaryna da, ýákiletti memlekettik organdarǵa da usyndy, - dep túsindirdi vedomstvodan.

Ársen Dúısenbekov atalǵan jaǵdaıǵa qatysty polıtsııaǵa aryz jazǵanyn jetkizdi. Óz kezeginde Almaty qalalyq Polıtsııa departamenti tergeý amaldary bastalǵanyn málimdedi.

– Túrksib aýdandyq polıtsııa basqarmasynyń tergeý bólimi atalǵan derek boıynsha tergeý amaldaryn bastady. Qazir medıtsınalyq jáne farmatsevtıkalyq baqylaý komıtetiniń Almaty qalasy boıynsha departamentine is materıaldary joldandy. Olardyń uıǵarymy boıynsha, eger dárigerdiń qateligi dáleldenetin bolsa, QR Qylmystyq kodeksiniń 317-babyna sáıkes qylmystyq is qozǵalyp, tıisti saraptamalyq zertteýler júrgiziletin bolady, - dep túsindirdi Almaty qalalyq Polıtsııa departamentiniń resmı ókili Saltanat Ázirbek.

Eske sala ketsek, buǵan deıin Almaty qalalyq ortalyq klınıkalyq aýrýhanasynda jatqan 3 naýqastan adamnyń ımmýndyq tapshylyq vırýsy anyqtalǵanyn jazǵan bolatynbyz.