Almatyda 45 myń oryndyq jańa stadıon salynady: joba qaı kezeńde

ALMATY. KAZINFORM — Almatyda aldaǵy jyldary 45 myń kórermendi bir mezette qabyldaı alatyn jańa fýtbol stadıony boı kótermek. 2026 jyldyń aqpan aıynyń basyndaǵy jaǵdaı boıynsha joba ázirlik kezeńinde tur. 

Almaty qurylys basqarmasy Kazinform agenttiginiń resmı saýalyna bergen jaýabynda qazirgi ýaqytta nysannyń jobalyq-smetalyq qujattamasy ázirlenip jatqanyn habarlady.

Basqarma málimetinshe, stadıon qurylysyna Medeý aýdanyndaǵy Qulja tasjoly boıynan jer telimi bólingen. Sport nysany halyqaralyq talaptarǵa tegis saı bolady.

— Stadıon UEFA-nyń IV sanat talaptaryna sáıkes salynady. Joba aıasynda tabıǵı shóp tósenishi bar fýtbol alańy qarastyrylǵan. Sondaı-aq myńnan astam avtokólikke arnalǵan turaq ta qarastyrylǵan. Jobalyq-smetalyq qujattama halyqaralyq standarttar men Qazaqstan Respýblıkasynyń qurylys normalaryna sáıkes ázirlenip jatyr, — dedi Almaty qurylys basqarmasy basshysynyń orynbasary Dıas Zamanbekov.

Jankúıerlerdiń negizgi suraǵy — «Jańa stadıon qashan paıdalanýǵa beriledi?» Bul kún de alys emes.

— Qurylys-montaj jumystary 2027 jyldyń IV toqsanynda aıaqtalady dep josparlanyp otyr. Al nysannyń naqty quny jobalyq-smetalyq qujattama memlekettik saraptamadan ótkennen keıin belgili bolady, — dep málimdedi Dıas Zamanbekov.

Eske salaıyq, buǵan deıin Almatyda UEFA-nyń IV sanat talaptaryna saı keletin jańa stadıonnyń syıymdylyǵyn 35 myń orynnan 45 myńǵa kóbeıtý máselesi qarastyrylyp jatqanyn jazǵanbyz.