Almatyda 45 myń oryndyq stadıonnyń qurylysy qalaı júrip jatyr

Almaty qalasy Qurylys basqarmasynyń basshysy Nurbol Nursaǵatovtyń aıtýynsha, jańa alań Qulja jáne Talǵar tas joldarynyń arasynda boı kóteredi. Jobany iske asyrýǵa bólingen aýmaqtyń jalpy kólemi shamamen 32 gektar.

— Qazir nysanda qurylys jumystary qarqyndy júrgizilip jatyr. Joba zamanaýı sport ınfraqurylymyna qoıylatyn talaptarǵa sáıkes júzege asyrylyp, túrli deńgeıdegi jarystardy ótkizýge arnalǵan tolyqqandy sport keshenin qalyptastyrýdy kózdeıdi, — dedi Nurbol Nursaǵatov.

Vedomstvo basshysy jańa stadıon ÝEFA-nyń IV sanattaǵy talabyna tolyq saı bolatynyn atap ótti. Bul halyqaralyq deńgeıdegi fýtbol matchtary men iri sporttyq is-sharalardy ótkizýge múmkindik bermek.

Joba aıasynda negizgi fýtbol arenasymen qatar jattyǵý alańdary, sportshylar men komandalarǵa arnalǵan zamanaýı ınfraqurylym, jankúıerlerge arnalǵan aımaq, qaýipsizdik júıeleri jáne irgeles aýmaqty keshendi kóriktendirý jumystary qarastyrylǵan.

— Nysannyń kólik qoljetimdiligine de erekshe nazar aýdarylǵan. Qaladaǵy negizgi kóshelerdiń boıynda ornalasýy stadıondy Almatynyń kólik júıesine tıimdi kiriktirýge múmkindik beredi, — dep atap ótti ol.

Stadıonnyń qurylys jumystaryn 2028 jyldyń naýryzynda aıaqtaý josparlanǵan.

Eske salaıyq, bastapqyda Almatyda 35 myń oryndyq jańa stadıon salynatyny habarlanǵan.

Alaıda keıin Almaty ákimi stadıonnyń syıymdylyǵy 45 myńǵa ulǵaıtylatynyn aıtty.