Almatyda 45 myń oryndyq stadıon qurylysy qalaı júrip jatyr

ALMATY. KAZINFORM – Almatyda ÝEFA ІV sanatynyń talaptaryna saı jańa stadıon salynyp jatyr.

v
Foto: instagram/@etnomura

Aldaǵy jyldary megapolıstiń basty alańyna aınalatyn 45 myń kórermenge arnalǵan jańa stadıon qurylysy qandaı satyda ekenin Kazinform agenttigi anyqtap kórdi.

Zertteý men synaq júrgizilip jatyr

Almaty qalasy qurylys basqarmasynyń málimetinshe, qazir jalpy aýdany 32 gektar qurylys alańynda negizgi qurylys jumystaryn bastaýǵa daıyndyq jáne ınjenerlik-geologııalyq zertteý jumystary júrgizilip jatyr. Sebebi nysan salynatyn Qulja jáne Talǵar tasjoldarynyń arasyndaǵy bul aýmaqtyń seısmıkalyq qaýiptiligi - 10 ball.

- Qurylys konstrýktsııalarynyń ornyqtylyǵy men qaýipsizdigin qamtamasyz etý maqsatynda Qazaq qurylys jáne sáýlet ǵylymı-zertteý jáne jobalaý ınstıtýtymen (QazQSǴZI) birlesip, ınjenerlik-geologııalyq zertteýler júrgizilip keledi. Atap aıtqanda: topyraqtyń fızıkalyq-mehanıkalyq qasıetterin, beriktigin jáne júk kóterý qabiletin anyqtaý boıynsha jumystar atqarylýda, - dep habarlady basqarmadan.

Stadıon irgetasynyń qurylysy bastalmady

Odan bólek vedomstvo ókilderi qurylys alańynda synaq qadalary qaǵylyp jatqanyn da atap ótti. Bul jumystar bolashaq stadıon konstrýktsııalarynyń júktemesin kóteretin qadalardyń beriktigi men ornyqtylyǵyn anyqtaý úshin qajet.

- Stadıon irgetasynyń qurylysyn bastaý synaq qadalaryn synaý nátıjelerine jáne ınjenerlik-geologııalyq zertteýlerdiń qorytyndylaryna tikeleı baılanysty. Sol sebepti qazirgi ýaqytta negizgi irgetas konstrýktsııalaryn betondaý jumystary bastalǵan joq. Synaq nátıjeleri boıynsha tıisti tehnıkalyq qorytyndylar alynǵannan keıin irgetas qurylysyn bastaý kózdelgen, - delingen qurylys basqarmasynyń jaýabynda.

Sondaı-aq stadıon qurylysyna daıyndyq aıasynda ishinara jer jumystary oryndalǵan. Onyń ishinde: qurylys alańyndaǵy topyraqtyń ósimdik qabatyn alý jáne aýmaqty bastapqy tegisteý jumystary júrgizilgen. Degenmen, aýmaqty tegisteý tolyq aıaqtalǵan joq. Vedomstvo jaýabyna sáıkes, jer qazý jáne keri toltyrý jumystary jobalyq sheshimder men qurylys kezeńderine sáıkes júzege asyrylady.

Jyl sońyna deıin ne isteledi

Almaty qalasy qurylys basqarmasy basshysynyń orynbasary Nurbek Jasybaev 2026 jyldyń sońyna deıin qurylys alańynda myna jumystardy aıaqtaý josparlanǵanyn aıtty:

• Synaq qadalaryn qaǵý jáne synaý jumystaryn aıaqtaý, olardyń nátıjeleri boıynsha tıisti tehnıkalyq qorytyndylardy ázirleý;
• Stadıon arenasy men oǵan irgeles jattyǵý alańdarynyń aýmaǵynda jobada kózdelgen jer qazý, topyraqty óńdeý jáne tegisteý jumystaryn oryndaý;
• Qurylys alańyn qajetti ýaqytsha jáne turaqty ınjenerlik kommýnıkatsııalarmen, onyń ishinde elektrmen, sýmen jáne syrtqy jaryqtandyrýmen qamtamasyz etý boıynsha jumystardy júrgizý;
• Jobalyq qujattamaǵa sáıkes qadalardy ornatý jáne olardy betondaý josparlanyp otyr.

Buǵan deıin Almaty qalasyn damytý ortalyǵy qalada boı kóteretin stadıonnyń bolashaq beınesimen bólisken bolatyn.

Eske salaıyq, byltyr Almatyda 35 myń oryndyq jańa stadıon salynatyny habarlandy.

Keıin turǵyndar men qoǵam usynysy eskerilip, alań syıymdylyǵy 45 myń orynǵa ulǵaıtyldy.

Jańa stadıonnyń qurylysyn 2028 jyldyń naýryzynda aıaqtaý josparlanǵan.