Almatyda 43 jastaǵy er adamǵa júrek transplantatsııasy jasaldy

ALMATY. KAZINFORM – Kardıologııa jáne ishki aýrýlar ǵylymı-zertteý ınstıtýtynda úshinshi ret donorlyq júrekti patsıentke transplantatsııalaý operatsııasy jasaldy.

Kardıologııa jáne ishki aýrýlar ǴZI baspasóz qyzmetinen málim etkendeı, Almatydaǵy ortalyq qalalyq aýrýhanaǵa túsken 40 jastaǵy er adam donor boldy, dárigerler patsıenttiń mı ólimin rastady.

– Júrek Almaty oblysy Talǵar qalasynyń turǵyny 43 jastaǵy er adamǵa transplantatsııalandy. Ol ıshemııalyq kardıomıopatııaǵa, júre paıda bolǵan júrek aqaýyna, mıtraldy qaqpaqsha qyzmetiniń jetkiliksizdigine, 26% shyǵarylý fraktsııasy tómendegen sozylmaly júrek qyzmetiniń jetkiliksizdigine, 2022 jyly ınfarktqa shaldyqqan. Naýqasta azdaǵan dene qımyly kezinde entigý, júrektiń durys jumys istemeýi, jalpy álsizdik, bas aınalý shaǵymdary boldy,– dep atap ótti Kardıologııa jáne ishki aýrýlar ǵylymı-zertteý ınstıtýtynan.

Bes saǵatqa sozylǵan kúrdeli operatsııa sátti ótti, patsıent reanımatsııadan bólimshege aýystyryldy. Qazir jaǵdaıy turaqty, oń dınamıkasy bar.

Aıta keteıik, atalǵan emdeý mekemesinde júrek almastyrý operatsııasy úsh ret jasalyp otyr.

Buǵan deıin Qazaqstanda 4 myńnan astam adam transplantatsııa kezeginde turǵany týraly jazǵanbyz. Onyń ishinde 3723 naýqas búırekke muqtaj.