Almatyda 4,3 myńnan astam nysan múgedektigi bar jandarǵa beıimdelgen
ALMATY.KAZINFORM - Múgedektigi bar adamdardyń zańdy quqyqtaryn qamtamasyz etý jáne olar úshin qoljetimdi ortany qalyptastyrý maqsatynda Almaty qalasynda 4323 áleýmettik ınfraqurylym nysany tolyq beıimdeldi. Bul týraly Eńbek jáne halyqty áleýmettik qorǵaý mınıstrligi málimdedi.
Qazirgi ýaqytta Qazaqstanda 2025-2030 jyldarǵa arnalǵan ınklıýzıvti saıasat tujyrymdamasy, «AMANAT» partııasynyń 2023-2027 jyldarǵa arnalǵan jol kartasy jáne Memleket basshysynyń tapsyrmasy boıynsha ázirlengen «Halyqpen birge» jobasy iske asyrylyp jatyr.
«AMANAT» partııasynyń jol kartasynda 2023-2027 jyldar aralyǵynda ınteraktıvti qoljetimdilik kartasyna engizilgen 43 myńnan astam nysandy beıimdeý boıynsha jumys kózdelgen. Jyl saıyn osyndaı obektilerdiń 20%-y beıimdelýi tıis. Osylaısha, 2023 jyly – Kartadaǵy obektilerdiń 20%-y, 2024 jyly 40%, 2025 jyly 60%, 2026 jyly 80%, 2027 jyly 100%-y beıimdeledi. Qazirgi ýaqytta el boıynsha 24 216 nysan tolyqtaı beıimdelgen.
Búginde Almaty qalasynda 4323 nysan beıimdeldi. 2027 jyldyń sońyna deıin 5611 nysandy beıimdeý josparlanyp otyr.
Beıimdelgen nysandardyń jalpy sanynan múgedektigi bar adamdardyń barlyq sanaty úshin qoljetimdileri:
- densaýlyq saqtaý nysandary – 972;
- bilim berý nysandary – 800;
- mádenıet nysandary – 42;
- memlekettik jáne kvazımemlekettik uıymdar – 115;
- sport nysandary – 23;
- áleýmettik qorǵaý nysandary – 8;
- kólik ınfraqurylymy nysandary – 3;
- oıyn-saýyq jáne demalys oryndary – 21;
- qoǵamdyq tamaqtaný – 347;
- saýda nysandary menoıyn-saýyq ortalyqtary – 1 925;
- basqada nysandar – 67.
– Nysandardyń qoljetimdiligin qamtamasyz etý máseleleri boıynsha túsken ótinishterdi Áleýmettik qorǵaý salasyndaǵy retteý jáne baqylaý komıtetiniń departamenti belgilengen merzimde qarap, tıisti sharalar qabyldaıdy. Sonyń nátıjesinde ınfraqurylym nysandaryna qoljetimdilik qamtamasyz etilip jatyr, – dep óz pikirin bildirdi Almaty qalasynyń turǵyny, І toptaǵy múgedektigi bar azamat Ulan Іńkárbekov.
Bıyl Almaty qalasy boıynsha Áleýmettik qorǵaý salasyndaǵy retteý jáne baqylaý komıtetiniń departamenti QR Áleýmettik kodeksiniń talaptarynyń oryndalýyn tekserý maqsatynda 77 tekseris júrgizdi. Onyń ishinde múgedektigi bar adamdardyń áleýmettik jáne kólik ınfraqurylymy nysandaryna qoljetimdiligin qamtamasyz etý máseleleri de qarastyryldy. Atap aıtqanda: profılaktıkalyq baqylaý aıasynda – 9, jospardan tys – 58, prokýratýra organdarynyń bastamasymen 10 tekseris júrgizildi.
Tekserý nátıjesinde múgedektigi bar adamdardy áleýmettik qorǵaý jáne arnaıy áleýmettik qyzmetter kórsetý salasynda anyqtalǵan zańbuzýshylyqtardy joıý jóninde 48 nusqama berildi. Sondaı-aq jalpy somasy 5 mln 308,2 myń teńge bolatyn 13 ákimshilik aıyppul salyndy. Birlesken tekserýlerdiń qorytyndysy boıynsha prokýratýraǵa 10 qorytyndy usynyldy.
Obektilerdiń menshik ıelerine profılaktıkalyq baqylaý júrgizý kezinde buzýshylyqtar alǵash ret anyqtalǵan kezde olardy ákimshilik jaýapkershilikke tartpaı, olardy joıý týraly nusqamalar ǵana engiziletinin atap ótý qajet. Nusqama belgilengen merzimde oryndalmaǵan jaǵdaıda aıyppul salynatyn bolady.
Aıta keteıik, bıyl múgedektigi bar adamdar portal arqyly 467 myńnan astam qyzmet aldy.