Almatyda 40 mlrd bólingen Raıymbek dańǵylyndaǵy BRT jobasy nelikten toqtap qaldy
ALMATY. KAZINFORM — Almatynyń basty kósheleriniń birinde BRT jelisiniń qurylysy toqtap tur.
Megapolıstiń shyǵysy men batysyn baılanystyratyn Raıymbek dańǵylynda qoǵamdyq kólikke basymdyq beretin BRT jelisiniń qurylysy 2025 jyldyń sáýir aıynda bastaldy. Bastapqy jospar boıynsha kósheniń 17 shaqyrymynda arnaıy qoǵamdyq kólik joly salynýy tıis bolǵan.
Bul jelini Tımırıazev kóshesinde jumys istep turǵan BRT jelisimen Jeltoqsan kóshesi arqyly baılanystyrý josparlandy. Shart boıynsha jumystarǵa bıýdjetten 39,9 mlrd teńge qarastyryldy. Jobaǵa eki merdiger bekitildi — «Kazahdorstroı» JShS jáne «Progress KZ» JShS.
Alaıda Jeltoqsan kóshesindegi BRT qurylysy ýaqytyly aıaqtaldy da, al Raıymbek dańǵylyndaǵy joba toqtap qaldy.
Birneshe aı buryn qala bıligi jobanyń bastapqy tujyrymdamasyn ózgertý múmkindigin qarastyrylyp jatqanyn málimdedi. Tipti Emtsov pen Ótegen batyr kósheleriniń aralyǵyndaǵy arnaıy jolaqtyń daıyn bóligi buzylýy múmkin ekeni aıtyldy. Osy oraıda, Kazinform agenttigi Almaty ákimdigine júginip, BRT jobasy boıynsha qandaı sheshim qabyldanǵanyn surady.
Almaty qalasy Jol ınfraqurylymyn damytý basqarmasynyń málimetinshe, qazirgi ýaqytta Raıymbek dańǵylynyń boıyndaǵy BRT jobasy boıynsha qurylys-montaj jumystary 37%-ǵa oryndalǵan. Biraq aldaǵy ýaqytta ony jalǵastyrý josparlanyp otyrǵan joq.
— Raıymbek dańǵyly boıyndaǵy BRT jobasy boıynsha qurylys-montaj jumystary Almaty SkyTrain jobasyn iske asyrýǵa baılanysty ýaqytsha toqtatyla turady. SkyTrain jobasy monorelsti kólik júıesin damytýdy qarastyrady, — dep habarlady basqarmadan.
Vedomstvo búginde salynyp qoıǵan BRT ýchaskeleri buzylatynyn ne buzylmaıtynyn naqtylaǵan joq. Alaıda óz jaýabynda SkyTrain jobasy júzege asyrylǵan soń, ol BRT jelilerimen ıntegratsııalanatyn atap ótti. Bul qalanyń biryńǵaı mýltımodeldi kólik jelisin qalyptastyrýǵa múmkindik bermek.
— Raıymbek dańǵyly Almaty qalasynyń shyǵys jáne batys aýdandary arasyndaǵy baılanysty qamtamasyz etetin negizgi magıstral bolǵandyqtan, qoǵamdyq kólik júıesin damytý úshin mańyzdy kólik dálizi bolyp qala beredi, — delingen basqarma jaýabynda.
Eske salaıyq, Skytrain — bul estakadalar arqyly jerden bıikte júretin monorelsti poıyz. Mundaı qoǵamdyq kólik búginde Vankýverde (Kanada) qoldanylady. Ol — tolyqtaı avtomattandyrylǵan, júrgizýshisiz basqarylatyn aspaly metro.
Almatynyń bas josparyna engizilip jatqan ózgerister boıynsha bul kólik Raıymbek dańǵyly, Saın kóshesi, Ál-Farabı dańǵyly jáne Shyǵys avtomobıl aınalma jolymen júrýi tıis. Skytrain-niń naqty jobasy aldaǵy ýaqytta belgili bolady.
Sondaı-aq Almatyda metro jelisi úsh baǵytta damymaq. Biz olardyń árqaısysy qandaı satyda turǵanyn jazǵanbyz.
