Almatyda 40 qabatty keshenniń endigi taǵdyry ne bolmaq
ALMATY. KAZINFORM — Almatyda 40 qabatty keshenniń qurylysy tóńiregindegi daý áli de basylǵan joq. Kazinform tilshisi osy jobanyń qazirgi jaǵdaıy men alda ne bolaryn anyqtap kórdi.
RAMS Beyond dep atalatyn 40 qabatty ǵımarattyń Tımırıazev kóshesi men Seıfýllın dańǵylynyń qıylysyndaǵy qurylysyna qatysty halyq arasynda kóp pikir aıtyldy. Redaktsııa bul nysan boıynsha jaǵdaıdy naqtylaý úshin Indýstrııa jáne qurylys mınıstrligine resmı saýal joldady.
Kimder jazalandy
Vıtse-mınıstr Qýandyq Qajkenovtiń aıtýynsha, «Kommertsııalyq jáne jerasty avtoturaǵy bar kópfýnktsıonaldy ǵımarat (JK Beyond)» jobasynyń tapsyrys berýshisi ári jer ýchaskesiniń ıesi — «BR Construction Qazaqstan» JShS.
Qala ákimdigi jer ıesine qatysty Ákimshilik quqyq buzý týraly kodekstiń 316-babynyń 1-bóligi men 321-baby boıynsha ákimshilik sharalar qabyldap, anyqtalǵan zań buzýdy joıý úshin qurylys jumystaryn toqtata turý týraly nusqama bergen.
— Búgingi tańda anyqtalǵan zań buzýdy joıý týraly nusqamaǵa sáıkes qurylys toqtatylǵan, — dedi vıtse-mınıstr.
Jobanyń endigi taǵdyry ne bolmaq
Qýandyq Qajkenovtiń aıtýynsha, salalyq zańnamaǵa sáıkes eldi meken aýmaqtaryn damytý, onyń ishinde qurylysqa ruqsat berý máseleleri jergilikti atqarýshy organdardyń quzyretinde.
— Bul nysan boıynsha qala ákimdigi sáýlet-josparlaý tapsyrmasyn jáne kelisilgen eskızdik jobany bergen. Qurylys qazirgi tańda toqtatylǵan. Osy jyldyń tórtinshi toqsanynda mınıstrlik josparly tekseris júrgizýdi josparlap otyr. Tekserý barysynda ruqsat qujattarynyń zańdy ne zańsyz ekeni qaralady. Eger zań buzý anyqtalsa, tıisti sharalar qabyldanady, — dedi vıtse-mınıstr.
Mınıstrlik ókili bul joba boıynsha sot isi júrip jatpaǵanyn aıtty.
Ákimdik ne deıdi
Jýyrda Almaty ákimi Darhan Satybaldy 40 qabatty ǵımaratqa qatysty depýtattyq saýalǵa jaýap berip, qala qurylysy baqylaý basqarmasy tarapynan qurylys kompanııasyna qatysty jospardan tys tekserý júrgizilgenin málimdedi.
Nátıjesinde, qurylys kompanııasy sáýlet-josparlaý tapsyrmasyn alyp, eskızdik jobany kelisýden ótkizgeni anyqtalǵan. Sondaı-aq, qazirgi tańda qurylys jumystary ýaqytsha toqtatylǵan. Bul aýmaqta skver nemese áleýmettik nysan salý josparlanbaǵan.
Buǵan deıin ákimdik Abaı dańǵylynyń ońtústiginde, ál-Farabı dańǵylynyń soltústiginde, ıAssaýı kóshesiniń shyǵysynda jáne Úlken aınalma joldyń batysynda toǵyz qabattan bıik kópfýnktsıonaldy ǵımarattardy salýǵa tek olardyń qoǵamdyq mańyzy dáleldengen jaǵdaıda jáne barlyq talap saqtalǵan kezde ǵana ruqsat beriletinin habarlady.
Eske salaıyq, tamyzdyń sońynda Almatyda qoǵamda úlken daý týdyrǵan 40 qabatty RAMS Beyond kesheniniń qurylysy ýaqytsha toqtatylǵan edi.