Almatyda 4 mln teńge utyp alǵan er adam alıment tólemeı kelgeni úshin sottaldy

ALMATY. KAZINFORM – Almaty prokýratýrasy bıyl alıment tólemeı júrgenderge baqylaýdy kúsheıtip, kirisin jasyryp qalǵan boryshkerlerdi de anyqtap jatyr. Sonyń biri – kazınodan mıllıondar utyp alǵanymen, óz balasyna alıment tóleýden qasaqana jaltarǵan er adam.

Almaty prokýratýrasy 1 741 757 teńge alıment qaryzy bar er adamdy anyqtady. Ol kazınodan 4 mln teńgeden astam utys utqanymen, úsh aıdan beri balasyna tólem jasaýdan qasaqana jaltarǵan.

Kámeletke tolmaǵandardyń isteri jónindegi mamandandyrylǵan aýdanaralyq sottyń úkimimen ol Qazaqstan Qylmystyq kodeksiniń 139-babyna sáıkes kináli dep tanylyp, bir jylǵa bas bostandyǵyn shekteý jazasyna kesildi.

– Jalpy, bıylǵy 10 aıda qala prokýratýrasynyń bastamasymen alıment tóleýden jaltarǵan 14 boryshker qylmystyq jaýapkershilikke tartyldy. Budan bólek, sot sheshimin oryndamaǵany úshin Ákimshilik kodekstiń 669-baby boıynsha 253 adam ákimshilik jazaǵa tartylǵan, - dep habarlady qalalyq prokýratýra.

Qabyldanǵan sharalardyń nátıjesinde 16 myńnan astam balanyń paıdasyna 1 mlrd teńgeden astam alıment bereshegi óndirildi.

Prokýratýra ata-analardy balalar aldyndaǵy óz mindetterin ýaqtyly oryndaýǵa shaqyryp, alıment tóleýden jaltarý ákimshilik jáne qylmystyq jaýapkershilikke ákeletinin eskertti.

Eske salaıyq, buǵan deıin Shymkentte alıment boıynsha 4,8 mln teńge bereshegi bar er adam sottalǵanyn habarlaǵan edik.