Almatyda 4 myńǵa jýyq moped júrgizýshisi jaýapqa tartyldy
ALMATY. KAZINFORM — Almatyda moped júrgizýshileriniń jol qozǵalysy erejelerin buzý faktilerin anyqtaýǵa baǵyttalǵan jumys jalǵasyp jatyr.
2025 jyldyń 5 sáýiri, ıaǵnı mopedterdi paıdalanýǵa qoıylatyn jańa talaptar kúshine engennen beri Almatyda 1,5 myńǵa jýyq motokólik mamandandyrylǵan aıyppul turaǵyna qoıyldy. Quqyq buzýdy anyqtaý sharalary «Qaýipsiz jol» jedel-profılaktıkalyq is-sharasy aıasynda júrgizildi.
Jańashyldyqqa sáıkes, moped júrgizýshilerinen «A» sanatyndaǵy júrgizýshi kýáligi, kólik quralyn memlekettik tirkeýden ótkizý, saqtandyrý polısi men memlekettik nómir bolýy tıis.
— Osy talaptar engizilgeli beri qalada 4 myńǵa jýyq moped júrgizýshisi ákimshilik jaýapqa tartyldy. Sonymen qatar jol qozǵalysy erejelerin óreskel buzǵan 1,5 myńǵa jýyq moped arnaıy aıyppul turaǵyna qoıylǵan. Bul kólikterdiń ishinde júrgizýshi kýáligi men memlekettik nómirsiz basqarylǵan, qaýipsizdik talaptaryn elemegender de bar. Buzýshylyqtar patrýldik qyzmet, statsıonarlyq beketter jáne beınebaqylaý júıeleri arqyly tirkeledi, — dedi Almaty qalalyq polıtsııa departamentiniń jergilikti polıtsııa qyzmeti basqarmasynyń bastyǵy Serik Shýmaev.
Aıta keteıik, Almatyda jyl basynan beri mopedshilerdiń kesirinen 233 jol apaty bolyp, 243 adam zardap shekti.