Almatyda 4 kásiporyn qyzmetkerleriniń jalaqysyn bermeı otyr
ALMATY. KAZINFORM – Almatyda 2026 jyldyń birinshi toqsanynda azamattardyń 3 myńǵa jýyq ótinishi qaralyp, eńbek zańnamasyn buzǵan 300-den astam oqıǵa anyqtaldy. Bul týraly qalalyq memlekettik eńbek ınspektsııasy departamentiniń ókilderi aıtty.
Departament basshysynyń orynbasary Qasymbek Saılaýovtyń aıtýynsha, osy ýaqytta jeke jáne zańdy tulǵalardan 2 969 ótinish kelip túsipti. Sodan 297 jospardan tys tekserý júrgizilip, 331 zań buzýshylyq anyqtalǵan eken, onyń basym bóligi eńbek qatynasyna qatysty bolyp shyqqan.
– Birinshi toqsanda biz azamattardyń eńbek quqyǵyn qorǵaý baǵytynda úlken jumys júrgizdik. 3 myńǵa jýyq ótinishti qarap, shamamen 300 tekserý ótkizdik. Nátıjesinde 300-den astam zań buzýshylyq anyqtaldy, olardyń kópshiligi eńbekaqy tóleýge baılanysty. Bul qyzmetkerlerdi qorǵaý máselesi áli de ózekti ekenin kórsetedi, - dedi Qasymbek Saılaýov Óńirlik kommýnıkatsııalar qyzmetinde ótken baspasóz konferentsııasynda.
Tekserý qorytyndysy boıynsha 202 nusqama berilip, onyń 140-y oryndalǵan, bul – 69,3%. 159 tulǵa ákimshilik jaýapkershilikke tartylyp, aıyppuldyń jalpy somasy 33,4 mln teńgege jetti, onyń 18,1 mln teńgesi óndirildi. Óndiriste 14 oqys oqıǵa tirkelip, 14 qyzmetker zardap shekken.
– Aıyppuldyń 60%-dan astamy óndirildi, nusqamanyń da basym bóligi oryndaldy. Óndiriste jaraqat alý jaǵyn da baqylap otyrmyz, óıtkeni qyzmetkerlerdiń qaýipsizdigi – basty basymdyqtyń biri, - dedi ol.
Qazir 63 qyzmetkerge 31,6 mln teńge bereshek bolyp qalǵan 4 kásiporyn bar. Osyndaı uıymnyń qatarynda «Begaly» jeke kásip ıesi men birneshe jekemenshik mektep te bar, olar da jalaqy men ótemaqy jaǵynan qaryz.
– Biz nusqama berip, aıyppul salyp, materıaldardy májbúrlep oryndaýǵa jiberdik. Jaǵdaıdy baqylaýda ustap otyrmyz, ishinara tólem jasalyp jatyr, eńbek daýyna negiz joq, - dedi vedomstvo basshysy.
Jalpy, osy kezeńde departament júrgizgen jumystyń arqasynda 45 kásiporynda 44,1 mln teńge kólemindegi eńbekaqy qaryzy ótelip, 78 qyzmetkerdiń quqyǵy qorǵaldy. Byltyr 163 uıymda 1 mlrd teńgeden astam qaryz ótelip, shamamen 2,9 myń qyzmetkerdiń aldyndaǵy bereshek jabylǵan.
Eske salaıyq, buǵan deıin Astanada 254 kásiporynda eńbek quqyǵynyń buzylý qaýpi joǵary ekenin habarlaǵanbyz.
