Almatyda 4 birdeı egiz jup áskerı qyzmetin ótep jatyr
ASTANA. KAZINFORM – Almaty qalasynda ornalasqan ІІM Ulttyq ulanynyń 5571 áskerı bóliminde buryn-sońdy bolmaǵan oqıǵa tirkeldi. Bir mezette munda tórt birdeı egizder juby merzimdi áskerı qyzmetin ótep jatyr. Bul Ulttyq ulan tarıhynda alǵash ret kezdesip otyr.
Ádette bir shaqyrylymda egizder jubynyń azamattyq boryshyn óteýiniń ózi sırek jaǵdaı. Al bir bólimde tórt juptyń qatar qyzmet etýi — Ulttyq ulanda erekshe qubylys.
Áskerı bólimdegi eń birinshi egizder legin Túrkistan oblysynan kelgen — Nurasyl men Erasyl Jamalhan bastady. Kóp uzamaı olardyń qataryn Erasyl men Nurasyl Úısinbaı tolyqtyrdy. Eki Erasyl men eki Nurasyldyń bir bólimde qatar qyzmet etýi — áskerılerdiń ózi úshin tosyn jaǵdaı boldy. Komandırler olardyń túrin ajyratýda keıde qınalatynyn jasyrmaıdy, alaıda sarbazdar muny ázilmen qabyldaıdy. Búginde qos Nurasyl men qos Erasyl megapolıstiń qoǵamdyq tártibin saqtaý boıynsha patrýldik qyzmet atqaryp júr.
Shymkentten shaqyrylǵan Erdáýlet pen Baqdáýlet Tólenovter de áskerı ujymda erekshe yqylasqa ıe. Olardy da jıi shatastyryp, tipti kazarmada sarbazdar «Bizde eki jaýynger emes, bireýiniń qos kóshirmesi bar» dep ázildeıdi. Birde komandır Erdáýletke tapsyrma berip, onyń oryndalý esebin Baqdáýletten qabyldaǵanyn baıqamaı qalǵan. Alaıda egizderdiń aıtýynsha, birge qyzmet etý jeńil, sebebi olar bir-birin sózsiz túsinedi.
Erekshe tórttikti túıindeıtin jup — Jezqazǵannan kelgen Salman men Magomed Ýrýzbıevter. Olardyń áskerge birge kelýi baýyrmaldyqtyń jarqyn úlgisine aınaldy. Magomedtiń áskerge shaqyrylǵanyn bilgen Salman da baýyrynyń qasynda bolýdy jón kórip, qatar qyzmet etýge bel býǵan. Qazir olar bir sapta júrip, jaýyngerlik mindetterin atqaryp keledi.
Búginde tórt egizder jubynyń oqıǵasy — áskerdegi tártiptiń, ózara túsinistiktiń jáne naǵyz baýyrmaldyqtyń úlgisine aınalyp qana qoımaı, Ulttyq ulannyń tarıhynda erekshe iz qaldyrary sózsiz. Al eger siz Almaty kóshelerinde bir-birine qatty uqsaıtyn egizderden quralǵan áskerı jasaqty kezdestirseńiz, tańǵalmańyz — olar osy oqıǵanyń keıipkerleri bolýy múmkin.
Aıta ketelik Ulttyq ulan Bas qolbasshysynyń orynbasary qandaı kúdikke ilingeni týraly jazǵan edik.