Almatyda 39 jastaǵy áıel úshem bosanyp, birden kópbalaly ana atandy

ALMATY. KAZINFORM – Almaty perınataldyq ortalyǵynda úshem sábı ómirge keldi. 39 jastaǵy almatylyq áıel birden alty balanyń anasy atandy. Buǵan deıin onyń otbasynda úsh bala bolǵan.

Qoǵamdyq densaýlyq saqtaý basqarmasynyń málimetinshe, júktilik tabıǵı jolmen, qosalqy reprodýktıvti tehnologııa qoldanylmaı-aq júzege asqan. Mundaı jaǵdaı akýsherlik tájirıbede sırek kezdesedi eken.

Bosaný júktiliktiń 32 apta eki kúninde shuǵyl túrde kesar tiligi arqyly ótti. Túngi saǵat úsh shamasynda akýsher-gınekologtar, anestezıologtar jáne neonatologtardan quralǵan kópsalaly medıtsınalyq komanda jedel túrde jumyldyryldy.

Salmaǵy 1 840 gramm, boıy 42 sm ul bala, salmaǵy 1 680 gramm, boıy 43 sm taǵy bir ul bala, salmaǵy 1 620 gramm, boıy 40 sm qyz bala dúnıege keldi. Ul balalarǵa Zańǵar men Aıbar, qyz balaǵa Ásel degen esim qoıyldy.

Ortalyq dırektorynyń uıymdastyrý-ádistemelik jumys jónindegi orynbasary Saltanat Erbolatovanyń aıtýynsha, shala týǵan sábıler ómiriniń alǵashqy mınýtynan bastap qarqyndy baqylaýǵa alynyp, arnaıy em qabyldady jáne apparat arqyly tynys alýǵa qoldaý kórsetildi.

– Úshemge jeke kútim beketi bólinip, sábıler táýlik boıy dárigerlerdiń baqylaýyna alynǵan. Qazirgi tańda balalar salmaq qosyp keledi, jaǵdaıy turaqty dep baǵalanyp otyr. Aldaǵy ýaqytta aýrýhanadan shyǵarýǵa daıyndalyp jatyr, - delingen habarlamada.

Eske salaıyq, buǵan deıin Almatyda byltyr 40 846 náreste ómirge kelgenin jazǵanbyz. Sonyń ishinde 300-ge jýyq egiz, al úsh otbasyda úshem dúnıege keldi.