Almatyda 37 jastaǵy er adam 11-qabattan sekirip ketti
ALMATY. KAZINFORM — Almaty qalasynyń Bostandyq aýdanynda qaıǵyly jaǵdaı boldy.
Qalalyq polıtsııa departamentiniń málimetinshe, megapolıs turǵyn úı keshenderiniń birinde 37 jastaǵy er adam óz páteriniń 11-qabatynan sekirip ketken. Ony alǵash bolyp turǵyn úı kesheniniń kúzet qyzmetkeri baıqap, dereý jedel qyzmetterdi shaqyryp, alǵashqy kómek kórsetýge áreket jasaǵan.
— Oqıǵa ornyna jedel medıtsınalyq járdem brıgadasy men polıtsııa qyzmetkerleri keldi. Er adam shuǵyl túrde medıtsınalyq mekemege jetkizildi. Alaıda dárigerlerdiń barlyq kúsh-jigerine qaramastan, er adam esin jımastan kóz jumdy, — dep habarlady departamentten.
Polıtsııa marqumnyń jeke basy anyqtalyp, oqıǵanyń mán-jaıy men sebepteri tergelip jatqanyn málimdedi.
Eske salaıyq, Pavlodarda órtenip jatqan úıdiń terezesinen sekirgen qyz kóz jumdy.
