Almatyda 34 júrgizýshi qoǵamdyq kólik basqarýdan shettetildi – prokýratýra

ALMATY. KAZINFORM – Almaty qalasy Jetisý aýdanynyń prokýratýrasy birqatar avtobýs parkterinde zań talaptarynyń óreskel buzylǵandyǵyn anyqtady.

Almaty prokýratýrasynyń málimetinshe, «D» sanatyndaǵy júrgizýshi kýáligi joq, kólik quraldaryn júrgizý quqyǵynan aıyrylǵan, sondaı-aq medıtsınalyq qarsy kórsetkishteri bar adamdardyń jolaýshylar kóligin júrgizýine jol berilgen.

– Anyqtalǵan faktiler boıynsha 15 avtobýs parkine qatysty ákimshilik is qozǵalyp, kináli tulǵalar zańda kózdelgen jaýaptylyqqa tartyldy. Eńbek sharty buzylǵan 34 júrgizýshi, jolaýshylar kóligin basqarýdan shettetildi. Tártiptik jáne ákimshilik jaýaptylyqqa 4 laýazymdy tulǵa tartyldy, - dep habarlady quqyq qorǵaý organy.

Sonymen qatar qalalyq prokýratýra narkologııalyq jáne psıhıatrııalyq esepte turǵan adamdardyń júrgizýshi kýálikterin sot tártibimen jaramsyz dep taný máselesi pysyqtalyp jatqanyn málimdedi.

Eske salaıyq, Almaty men Astanada júrgizýshisiz taksı jobasy iske qosylatynyn jazǵanbyz.