Almatyda 33 myńnan astam oqýshyǵa mektepte oryn jetispeıdi

ALMATY. KAZINFORM – Almatyda mektepterdegi oryn tapshylyǵy eki ese azaıady. Qalada jyl sońyna deıin 21 jańa mektep salynady.

Bul týraly qala ákiminiń orynbasary Azamat Qaldybekov aıtty.

– Qazir Almatyda 349 mektep bar, onda 354 myńnan astam oqýshy bilim alyp jatyr. Halyq sany jyl saıyn 12-14 myń adamǵa ósip jatqandyqtan 33 myńnan astam oqýshy orny jetispeıdi. Qabyldanyp jatqan is-sharalardyń nátıjesinde bıyl bul tapshylyq 16 500 orynǵa deıin azaıady, - dedi Qaldybekov.

Almatyda «Keleshek mektepteri» jobasy da úlken qarqynmen ise asa bastady. Búgingi tańda jalpy syıymdylyǵy 34,8 myń oqýshy ornyn qamtıtyn 21 mektep salynyp jatyr.

Joba aıasynda 12 600 oryndyq 8 jańa mektep salynyp, paıdalanýǵa berildi. Qazan aıynyń sońyna deıin taǵy 10 500 oryndyq 5 mektep ashylmaq. Sonymen qatar jeke ınvestıtsııalar esebinen «satyp alý» tetigi arqyly salynǵan 11 700 oryndyq 8 mektep bıyl paıdalanýǵa beriledi.

– Budan bólek, 2025 jyldyń sońyna deıin 550 oryndyq bir mektepti ashyp, jalpy syıymdylyǵy 2 100 oryndy 2 mektepti satyp alyp, 6 mektepke japsarjaılar salý josparlanǵan. Bul qosymsha 1 795 oryn beredi, – dedi qala ákiminiń orynbasary.

Qalada sonymen qatar 31 mekteptiń tizimi bekitilgen «2025-2027 jyldarǵa arnalǵan 1300 mektepti jańalaý» jobasy iske asyrylyp jatyr. Bıyl 15 mektepte jóndeý-qaıta jańartý jumystary josparlanǵan, olardyń altaýynda (№160, 73, 60, 50, 30 jáne 124) qurylys jumystary bastalyp ketti. Keler jyly taǵy 9 mektep, 2027 jyly 7 bilim berý nysany jańartylady.

Jańartý baǵdarlamasyn júzege asyrý mektepterdiń jalpy syıymdylyǵyn shamamen 5 myń orynǵa arttyryp, ǵımarattardyń seısmoturaqtylyǵyn kúsheıtiledi.

Eske salaıyq, buǵan deıin Almatyda 18 nysan seısmıkalyq turǵyda kúsheıtilgenin jazǵanbyz.