Almatyda 31-shi qalalyq kitaphana ashyldy

ALMATY. KAZINFORM – Almatyda qala ákimdigi men Mádenıet basqarmasynyń qoldaýymen jańa kitaphana saltanatty túrde ashyldy.

Almaty Kitaphanalaryna qarasty jańa nysan Qulboldy kóshesi, 1/2, 2-korpýs mekenjaıy boıynsha saǵat 08:30-20:00 ýaqyt aralyǵynda demalyssyz jumys isteıdi.

Kitaphananyń ashylý rásimine Almaty turǵyndary, qala basshylyǵynyń ókilderi, belgili jazýshylar, qoǵam qaıratkerleri jáne mádenı qaýymdastyq ókilderi qatysty. Almaty ákiminiń orynbasary Abzal Núkenovtyń aıtýynsha, mundaı ortalyqtar qoǵamdyq ómirdiń jandanýyna yqpal etip, qala turǵyndarynyń zamanaýı aqparattyq ári bilim berý resýrstaryna erkin qol jetkizýine múmkindik beredi.

Kitaphanada kompıýtermen jumys isteýge arnalǵan arnaıy zal, jeke oqý úshin qolaıly tynysh aımaqtar, sondaı-aq birlesken kezdesýler men shyǵarmashylyq bastamalardy júzege asyrýǵa laıyqtalǵan keńistikter qarastyrylǵan. Jalpy munda 20 myńǵa jýyq kitap qory qalyptastyrylǵan.

Sonymen qatar kitaphananyń basty erekshelikteriniń biri - erekshe qajettiligi bar azamattar úshin arnaıy beıimdelgen jumys oryndary qarastyrylǵan. Olar kórý qabileti tómen jáne zaǵıp oqyrmandarǵa arnalǵan Braıl baǵdarlamalary men dybystyq ınterfeıstermen jabdyqtalǵan.

- Mundaı jańa ári zamanaýı kitaphanalardyń ashylýy – oı men bilimdi toǵystyryp, ult rýhanııatyn jańa deńgeıge kóteretin mańyzdy mádenı keńistik. Bul bastama oqyrman mádenıetiniń damýyna zor serpin beredi dep senemin, – dedi Qazaqstan Jazýshylar odaǵynyń tóraǵasy Mereke Qulkenov.

Eske salaıyq, Almatyda Táýelsizdik kúnine oraı jańa zamanaýı kitaphana ashyldy. Ol Rozybakıev kóshesi 247-úı, 7- blok mekenjaıynda ornalasqan.