Almatyda 300 kýrsant Ant qabyldady
ASTANA. KAZINFORM - Almaty qalasynda, 28 panfılovshy saıabaǵynda M. Esbolatov atyndaǵy Almaty akademııasynyń birinshi kýrs kýrsanttary Ant qabyldaý rásimin saltanatty túrde ótkizdi.
Bıylǵy is-shara erekshe formatta uıymdastyrylyp, eki aıtýly dataǵa arnaldy – Respýblıka kúnine 35 jyl jáne Uly Jeńistiń 80 jyldyǵy. Ótetin oryn da sımvoldyq mánge ıe: Panfılovshylar saıabaǵy – tarıh pen taǵzymǵa toly qasıetti meken, urpaqtar sabaqtastyǵyn sezindiretin, otansúıgishtik rýhyn darytatyn oryn.
Saltanatty sharaǵa ishki ister organdarynyń ardagerleri, qurmetti qonaqtar, ІІM basshylyǵy, kýrsanttardyń ata-analary jáne Gonkong polıtsııa akademııasynan arnaıy delegatsııa qatysty.
– Búgin bizdiń jas kýrsanttar ómirindegi eń alǵashqy ári mańyzdy qadamdy jasap otyr. Olar Ant qabyldady. Halyqqa adal qyzmet etýge, zańdy qasterleýge jáne ofıtser abyroıyn saqtaýǵa sert berdi. Bul oqıǵanyń dál osy jyly, osy jerde ótýi biz úshin asa mańyzdy. Respýblıka kúni men Jeńis mereıtoıy táýelsizdiktiń baǵasyn, Otanǵa qyzmet etýdiń zor jaýapkershilik ekenin eske salady, – dep atap ótti QR ІІM Maqan Esbolatov atyndaǵy Almaty akademııasynyń bastyǵy, polıtsııa polkovnıgi Qalıjan Qoblandın.
Ata-analar úshin de bul kún erekshe tolqynys pen maqtanyshqa toly sát boldy.
– Bul kúndi biz kóp kúttik. Biz úshin bul balalarymyzdyń eseıip, mańyzdy sheshim qabyldaǵanynyń aıǵaǵy. Endi olar elge qyzmet etýge daıyn. Búgin olardy jınaqy, symbatty, ózine senimdi kórip, júregimizdi maqtanysh sezimi kerneıdi, – dedi ata-analardyń biri.
Jas kýrsanttar bul kúnge uzaq daıyndaldy. Búgin olar sap túzep, paradtyq kıimde, jınaqy da tártipti bolyp, akademııa qataryn tolyqtyryp, ofıtserlik jolǵa alǵashqy qadam basty.
Aıta keteıik, Ulttyq ulan kýrsanty oqýlyq jazyp shyqty.